Գյումրիում հունվարի 12-ին սպանված Ավետիսյանների գործով հայտնի է դատաբժշկական եզրակացության պատասխանը: Տուժողի իրավահաջորդի ներկայացուցիչ Երեմ Սարգսյանը NEWS.am-ի թղթակցի հետ զրույցում ասաց, որ ստացել եւ ծանոթացել են փորձաքննության եզրակացություններին, սակայն առայժմ նպատակահարմար չեն համարում հրապարակել դրանք: «Էական հանգամանքներ կան գործի հետ կապված, որոնք վերջնականապես իմի կբերվեն կամ կհաստատվեն, կհերքվեն գենետիկական փորձաքննությունների եզրակացությունները ստանալուց հետո»,-ասաց փաստաբանը:
Նա նշեց, որ օրինակ, գենետիկական փորձաքննությամբ կպարզվի տան անդամների եւ Պերմյակովի կողմից հետազոտող օբյեկտների վրա թողնված հետքեր կան, թե ոչ: Այս եզրակացությունները ստանալուց հետո կնշանակվի համալիր փորձաքննություն:
Հիշեցնենք, որ Ավետիսյանների ընտանիքի 6 անդամների սպանությունը տեղի է ունեցել 2015թ. հունվարի 12-ին։ Ավետիսյանների ընտանիքից ողջ էր մնացել 6 ամսական Սերյոժա Ավետիսյանը, որը ծանր վնասվածքներով տեղափոխվել էր բժշկական կենտրոն, ուր յոթ օր անց մահացել էր: Ավետիսյանների ընտանիքի 7 անդամի սպանության համար մեղադրվում է Գյումրիի 102-րդ ռուսական ռազմաբազայի ժամկետային զինծառայող Վալերի Պերմյակովը։ Մինչեւ օրս հարազատների համար անհայտ են սպանության պատճառները: Նրանց համար կասկածելի է նաեւ սպանության մեջ մեղադրվող անձը, արդյոք նա միայնակ է գործել եւ ինչպես է կարողացել միայնակ սպանել ընտանիքի 7 անդամներին: