«Արաբական կոալիցիայի» ռազմաօդային ուժերը ռմբակոծում են Եմենի հյուսիսային եւ հարավային նահանգները: Գիշերը եւ առավոտյան ժամերին ռմբակոծության է ենթարկվել Սանայի արվարձան Դուլեյմիում գտնվող օդուժի ռազմակայանը: Թաիզում ոչնչացվել են ՀՕՊ-ի ռադարներն ու մարտկոցները:
Այսօր՝ մարտի 31-ին, Եմենը շրջափակվել է ծովի կողմից:
Կոալիցիայի հրամանատարության ներկայացուցիչ գեներալ Ահմեդ Ասիրին հայտարարել է, որ հիմնական ուշադրությունը Եմենի հարավում Ադենի իրավիճակի վրա է, որտեղ ապստամբ հուսիները եւ նրանց կողմն անցած զորքերը փորձում են իրենց վերահսկողության տակ վերցնել Ադենը:
«Ալ Մայադին» հեռուստաալիքի փոխանցմամբ՝ չնայած օդային հարվածներին ու հարձակումներին, ապստամբներին ու զորքերի մի մասին հաջողվել է իրենց վերահսկողության տակ վերցնել հարավային մայրաքաղաքի միջազգային օդանավակայանը: Իսկ բուն քաղաքում շարունակվում են փողոցային մարտերը հուսիների կողմնակիցների եւ նախագահ Աբդ Ռաբբո Մանսուր Հադիին աջակցող զինված խմբավորումների միջեւ: