Չարբախում հնչած կրակոցների հետեւանքով վիրավորված Վարդան Կարապետյանին «Սուրբ Աստվածամայր» բժշկական կենտրոնից տեղափոխել են «Էրեբունի» հիվանդանոց: Այս մասին NEWS.am-ի թղթակցի հետ զրույցում ասաց հիվանդանոցի տնօրեն Նիկոլայ Դալլաքյանը:
Իսկ «Էրեբունի» բժշկական կենտրոնի Վերակենդանացման բաժանմունքի ղեկավար Արմեն Մուրադյանը NEWS.am-ի թղթակցի հետ զրույցում ասաց, որ հիվանդի վիճակը ծանր է, նրան վիրահատել են, առկա էր լյարդի պատռվածք, ողնաշարի վնասվածք, միացված է արհեստական շնչառության ապարատին: Վտանգ կա, որ տղամարդը կարող է հաշմանդամ դառնալ:
Նշենք, որ aysor.am-ի տեղեկություններով՝ մարտի 31-ի գիշերը Չարբախում կրակոցներ են հնչել, որի ժամանակ վիրավորվել է Երրորդմասցի Լյովիկի ընկեր ոմն Վարդանը: NEWS.am-ի թղթակցին ոստիկանությունից փոխանցել են, որ մարտի 31-ին ժ.02.45-ին «Սուրբ Աստվածամայր» բժշկական կենտրոնից հաղորդում է ստացվել, որ «որովայնի շրջանի հրազենային վնասվածք» բուժօգնության է տեղափոխվել 36-ամյա Վարդան Կարապետյանը: Պարզել են, որ Վարդան Կարապետյանը հիվանդանոց է տեղափոխվել իրենց տան մոտից: Կատարվում է քննություն:
