Թուրք-իրանական հարաբերություններում ուրեւէ սկզբունքային բարելավում կամ վատթարացում տեղի չի ունենա։ Այս մասին այսօր՝ մարտի 31-ին կայացած մամուլի ասուլիսի ժամանակ լրագրողներին հայտարարեց Կովկասի ինստիտուտի փոխտնօրեն, քաղաքագետ Սերգեյ Մինասյանը։
Քաղաքագետի կարծիքով՝ տարածաշրջանի երկրների հետ Իրանի հարաբերությունները հիմնականում ավանդական դինամիկա ունեն, ինչպես օրինակ՝ Հայաստանի, Ադրբեջանի, Թուրքիայի հետ։ «Եթե Իրանի միջուկային ծրագրի հարցով բանակցություններում որոշակի առաջընթաց տեղի ունենա, այդ դեպքում Թուրքիայի հետ Իրանի հարաբերություններում կարող են լուրջ փոփոխություններ տեղի ունենալ, քանի որ բացառված չէ նաեւ Իրան – ԱՄՆ, եւ Իրան-Արեւմուտք հարաբերությունների վերափոխումը»,- նշեց Մինասյանը։
Մարտի 31-ի վաղ առավոտյան Լոզանում մեկնարկել են Իրանի եւ միջազգային միջնորդ երկրների «վեցնյակի» միջեւ ընթացող բանակցությունները։
Հիշեցնենք, որ Թուրքիայի նախագահ Ռեջեփ Թայիփ Էրդողանը սուր քննադատության էր ենթարկել Եմենում տիրող իրավիճակի կապակցությամբ Իրանի վարած քաղաքականությունը, իսկ իրանցի պատգամավորներն իրենց հերթին կոչ էին արել Էրդողանին չեղյալ համարել առաջիկա այցը դեպի Թեհրան՝ պահանջելով հետ վերցնել երկրի հասցեին հնչեցրած մեղադրանքները։