Ամերիկյան General Motors ավտոընկերության մեքենաների մեկնարկման կոճակի խոտանի հետեւանքով առնվազն 77 մարդ է զոհվել։ Այս մասին են վկայում ընկերության՝ Տուժածներին փոխհատուցում վճարելու հիմնադրամի պաշտոնական կայքում հրապարակած տվյալները։ Եվս 140 մարդ տարբեր աստիճանի վնասվածքներ են ստացել, գրում է «Ինտերֆաքս»-ը։
Հիմնադրամի ղեկավար Քեննեթ Ֆայնբերգի խոսքով՝ անցյալ տարվա օգոստոսից ստացվել է մահվան դիմաց փոխհատուցման 475 դիմում։ Եվս 4.3 հազար դիմում են ներկայացրել վնասվածքներ ստացած մարդիկ։ Այս պահին ներկայացված հայցերից համոզիչ է ճանաչվել 218-ը։
Ներկայումս քննարկվում է ավելի քան 89 մարդու մահվան եւ 1.17 հազար մարդու վնասվածքների դիմաց փոխհատուցում վճարելու հարցը։ Համաձայն AFP-ի տեղեկությունների՝ յուրաքանչյուր մահացած մարդու դիմաց ընկերությունը 1 մլրդ դոլար փոխհատուցում կվճարի։
GM-ը տեղյակ էր Chevrolet Cobalts-ի եւ այլ մեքենաների խոտանի մասին, սակայն մինչեւ 2014թ. փետրվարը հետ չէր կանչել այդ մեքենաները։ Խոտանը հանգեցնում էր շարժիչի ավտոմատ անջատմանը, ինչի արդյունքում մեքենան հանկարծակի կանգ էր առնում։ Բացի այդ, անջատվում էին նաեւ ղեկի ուժեղացուցիչներն ու անվտանգության բարձիկները։
