Վրաստանի նախագահ Գեորգի Մարգվելաշվիլին անհրաժեշտ է համարում խորացնել հարաբերությունները ՆԱՏՕ-ի, ԵՄ-ի եւ եվրատլանտյան տարածքի անդամ համարվող ցանկացած պետության հետ։ Այդ մասին այսօր՝ մարտի 31-ին, երկրի խորհրդարանում ամենամյա զեկույցի ժամանակ հայտարարել է Վրաստանի նախագահը։
Նրա խոսքով՝ 2014թ. «հիբրիդային» պատերազմները, ահաբեկչությունը, պետական սահմանների բռնի փոփոխությունները հստակ ցույց տվեցին, ինչպիսի զանգվածային սպառնալիքների առաջ է կանգնել համաշխարհային կարգուկանոնը, գրում է «Գրուզիա Օնլայն»-ը։
«Մենք պարտավոր ենք ճիշտ գնահատել իրավիճակը եւ մեր ռազմավարությունը կառուցել համապատասխան ձեւով։ Վրաստանի անվտանգությունն անմիջականորեն կապված է եվրոպական եւ եվրատլանտյան ինտեգրման հետ։ Այս տարի մենք պետք է ավելի խորացնենք հարաբերությունները ինչպես ԵՄ-ի, ՆԱՏՕ-ի, այնպես էլ եվրատլանտյան տարածքի յուրաքանչյուր պետության հետ։
Վրաստանի կայունության եւ զարգացման գործում շահագրգռված պետությունների քանակը մեծացնելը մեր անվտանգության միջազգային լուրջ երաշխիքներից մեկն է։ Այդ պատճառով Վրաստանի խնդիրը մշտապես պետք է լինի միջազգային քաղաքականության օրակարգում։ Անթույլատրելի է, որ նեղ կուսակցական շահերը թուլացնեն եվրատլանտյան հարթակը»,- հայտարարել է նախագահը։