Հայաստանում պետք է ավելի շատ դրամ թողարկվի։ Այս մասին այսօր՝ մարտի 31-ին, լրագրողներին հայտարարեց ԲՀԿ պատգամավոր, ԱԺ տնտեսական հարցերով հանձնաժողովի փոխնախագահ Միքայել Մելքումյանը։
Նրա խոսքով՝ ներկա տնտեսական իրավիճակի պարագայում Կենտրոնական բանկի զսպող քաղաքականությունը աբսուրդ է։ «Անհասկանալի է, թե ինչպես կարելի է վերաֆինանսավորման դրույքը պահել 10.5 տոկոսի վրա այն ժամանակ, երբ մենք աղքատության նման ցուցանիշ ունենք։ Աղքատի համար ի՞նչ տարբերություն, սղաճը 5 տոկոս է, թե՞ 6, եթե նա ծախսելու գումար չունի։ Տնտեսության վերակենդանացման համար անհրաժեշտ է գնալ այնպիսի համարձակ քայլի, ինչպիսին լրացուցիչ թողարկումն է։ Հայաստանում ներկայիս ՀՆԱ-ի 38 տոկոս գումարային զանգվածի մակարդակից այն անհրաժեշտ է հասցնել գոնե մինչեւ ռուսական 52 տոկոսի մակարդակի։ Նոր փողերով անհրաժեշտ է աջակցություն ցուցաբերել խոշոր արտահանողներին։ Չէ՞ որ այդ փողերը նրանցից հետ կգան արժույթի տեսքով»,- եզրափակեց պատգամավորը։