Goldman Sachs բանկի փորձագետները կանխատեսում են, որ ոսկու, ադամանդի եւ ցինկի ուսումնասիրված պաշարները կբավարարեն եւս 20 տարի:
Այս մասին գրում է MarketWatch կայքը՝ հավելելով, որ պլատինի, պղնձի եւ նիկելի ուսումնասիրված պաշարներն էլ կբավարարեն 40 տարի:
Բանկի վերլուծաբան Յուջին Քինգը կարծում է, որ թանկարժեք մետաղների պաշարների կրճատումը կհանգեցնի դրանց գների կտրուկ աճի: «Հումքի բարձր գները թանկարժեք մետաղների շուկա նոր խաղացողներ կբերի, որոնք կնետվեն եկամտի հետեւից: Դա կհանգեցնի նոր հանքավայրերի որոնմանը»,- կարծում է վերլուծաբանը:
Ըստ Gazeta-ի, USAGOLD-ի վերլուծաբան Փիթեր Գրանտն էլ նշել է, որ ոսկու արդյունահանման գագաթնակետը վրա կհասնի մոտ ապագայում: «Պաշարների կրճատման հետեւանքով հումքի գների աճը սովորական պատմություն է»,- հայտարարել է նա:
Ավելի վաղ հաղորդվում էր, որ Bank of America Merrill Lynch-ի վերլուծաբանները խորհուրդ են տալիս ներդրում կատարել ոսկու մեջ. նրանք ենթադրում են, որ ամերիկյան արժույթի անկման հետեւանքով ոսկու մեկ ունցիայի գինը կարող է հասնել մինչեւ 1.300 դոլարի: