Թմրանյութ ապօրինի ձեռք բերելու, պահելու և իրացնելու կասկածանքով մոտ 1,5 տարի կալանավորված, այնուհետեւ արդարացված «Բաղրամյան» գյուղի հիվանդանոցի գլխավոր բժիշկ Գագիկ Հարությունյանին ապօրինաբար ազատել են աշխատանքից: Այս մասին NEWS.am-ի թղթակցի հետ զրույցում ասաց նրա փաստաբանը` Հարություն Հարությունյանը:
Նա նշեց, որ ազատ արձակվելուց հետո Արմավիրի մարզպետ Աշոտ Ղահրամանյանը անհարկի խոչընդոտներ էր ստեղծում նրա՝ աշխատանքի վերականգնվելու հարցում, թեեւ մինչեւ 2017թ պայմանագիր կա Գագիկ Հարությունյանի հետ եւ ըստ օրենքի՝ իրավունք չունեն նրան չվերականգնել աշխատանքում: Այսօր ստացել են Արմավիրի մարզպետի համապատասխան կարգադրությունը, ըստ որի՝ Գագիկ Հարությունյանն ազատվել է պաշտոնից եւ լուծվել է վերջինիս հետ կնքված աշխատանքային պայմանագիրը զբաղեցրած պաշտոնից չհամապատասխանելու հիմքով: Հարություն Հարությունյանը տեղեկացրեց, որ կարգադրության հիմքում դրված է ընդունման, հանձնման հանձնաժողովի աշխատանքներին զուգահեռ անցկացված ներքին աուդիտը եւ դրա արդյունքում կազմված հաշվետվությունը, ընդ որում՝ նույն ժամանակահատվածը ստուգվել է երկու անգամ: «Փաստորեն իմ վստահորդին ազատում են աշխատանքից «Աշխատանքային օրենսգրքով» նախատեսված ժամանակից ավել աշխատելու համար»,-ասաց նա: Փաստաբանը նշեց, որ իրենք արդեն իսկ դիմել են Վարչական դատարան՝ վիճարկելով մարզպետի այս կարգադրությունը: Նա ասաց նաեւ, որ Վարչական դատարանում վիճարկման հայցերի վարույթն ընդունվելու դեպքում ինքնին կասեցվում է վարչական ակտի կատարումը: Այսքանով նրանք չեն սահմանափակվի, մտադիր են մարզպետի կարգադրությունը վիճարկել նաեւ վերադասության կարգով ՀՀ վարչապետին:
Հիշեցնենք, որ 2013թ սեպտեմբերի 4-ին թմրադեղեր վաճառելու կասկածանքով՝ ձերբակալվել Էր Արմավիրի մարզի Բաղրամյան գյուղի հիվանդանոցի գլխավոր բժիշկ Գագիկ Հարությունյանը։ Ոստիկանությունը թե՛ հիվանդանոցում, թե՛ նրա տանը խուզարկությունները իրականացնելիս եղել է շատ գգույշ, գործել գաղտնիության քողի տակ։ 1,5 տարի անազատության մեջ մնալուց հետո ազատ է արձակվել հունվարի 27-ին: Վեց ամիս տեւած քննությունից հետո դատարանը եզրակացրել է, որ որեւէ ապացույց, ողջամիտ կասկած կամ ենթադրություն չի եղել: Գագիկ Հարությունյանը աշխատում է առողջապահության համակարգում 1986թ, իսկ 1994թ առ այսօր՝ որպես գլխավոր բժիշկ:
