Արեւմուտքը Մոլդովայի օլիգարխներին թույլ է տալիս գողանալ եւ ապօրինություններ կատարել մեկ պայմանով, այն է՝ Եվրամիության հանդեպ չեզոքություն պահպանել եւ հակառուսական քաղաքականություն վարել։ Այս մասին առցանց մամուլի ասուլիսի ժամանակ հայտարարեց Մոլդովայի Հանրապետության Սոցիալիստների կուսակցության անդամ Բոգդան Ցիրդյան՝ պատասխանելով NEWS.am-ի թղթակցի հարցին, թե Մոլդովայում ԵՄ-ի հետ ասոցացման համաձայնագրի ստորագրումից հետո դրական տեղաշարժ զգացվում է, թե ոչ։
Մոլդովացի քաղաքական գործչի խոսքով՝ ասոցացման համաձայնագրի ստորագրումից անմիջապես հետո իշխանամետ օլիգարխները բանկերից եւ ազգային արժութային պահուստներից հանեցին 2 մլրդ դոլար։ «Դա մի ամբողջ բյուջե է։ Խստացել են բիզնեսի վրա ստուգումների տեսքով կատարվող հարձակումները, սեւ սխեմայով «սեփականաշնորհվեց» Քիշնեւի օդանավակայանը եւ «Բանկա դե Էկոնոմի»-ն, որոնք ռազմավարական ձեռնարկություններ են։ Փաստացիորեն ընդդիմադիր բոլոր առաջնորդների դեմ քրեական գործ հարուցվեց»,- նշեց Բոգդան Ցիրդյան։
Նրա խոսքով՝ խորհրդարանական ընտրությունների ժամանակ անկախության 23 տարիների ընթացքում առաջին անգամ 15-16 տոկոս վարկանիշ ունեցող «Պատրիա» (Հայրենիք) կուսակցությունը քվեարկությունից 2 օր առաջ հանեցին ընտրություններից։ «Եվ դա այն պատճառով, որ Մոլդովայի Հանրապետության Սոցիալիստների կուսակցության հետ «Պատրիան» կարող էր փոխել քաղաքական ուժերի դասավորությունը եւ Մոլդովան շրջել դեպի Մաքսային Միություն։ Եվրապաշտոնյաները բոլոր այդ դեպքերում հաջողությամբ լռում էին»,- եզրափակեց Բոդգան Ցիրդյան։
Հիշեցնենք, որ 2014թ., հունիսի 27-ին Մոլդովան Վրաստանի հետ ստորագրեց ԵՄ-ի հետ ասոցացման համաձայնագիրը, որով նախատեսվում է երկիրը ընդգրկել ԵՄ ազատ առեւտրի գոտում։