Հայոց ցեղասպանության 100-րդ տարելիցի առթիվ Նեւադայի նահանգապետ Բրայեն Սանդովալը հռչակագիր է ստորագրել, որի համաձայն ապրիլի 19-ից 26-ը Նեւադայում հայտարարվել է Հայոց ցեղասպանության զոհերի հիշատակի շաբաթ: Նույնաբովանդակ հռչակագրով է հանդես եկել նաեւ Նեւադայի փոխնահանգապետ, Նահանգային սենատի նախագահ Մարկ Հաթչիսոնը: Երկու հռչակագրերում ԱՄՆ նախագահին եւ Կոնգրեսին կոչ է արվում ճանաչել հայ ժողովրդի նկատմամբ իրականացված վայրագությունները եւ Թուրքիային ստիպել ճանաչել պատմական փաստերը:
«Հայերի ծրագրված սպանությունը եւ տեղահանությունը, որ տեղի են ունեցել 1915-1923թթ., խլել են 1,5 մլն մարդու կյանք, տեղահանվել են ավելի քան 500 հազար հայեր: Շատերը հաստատվել են ԱՄՆ-ում, եւ այսօր Նեւադայում է ապրում աճող եւ ակտիվ հայ համայնք, որը ծայրահեղ անարդարությունից հետո գոյատեւելու եւ վերապրելու վառ օրինակ է», - գրված է Նեւադայի նահանգապետ Բրայեն Սանդովալի հռչակագրում:
Իբրեւ Նեւադայի նահանգապետի տեղակալ եւ նահանգային սենատի նախագահ` Մարկ Հաթչիսոնն, իր հերթին, Նեւադայի բնակիչներին կոչ է արել բարձրացնել Հայոց ցեղասպանության մասին իրազեկումը եւ մասնակցել անմեղ զոհերի հիշատակի միջոցառումներին:
