Երեւանի հիմնական եւ ավագ դպրոցների աշակերտներն այսօրվանից մինչեւ ապրիլի 24-ը Հայոց ցեղասպանության 100-րդ տարելիցի միջոցառումների շրջանակում հերթափոխով պատվո պահակ կկանգնեն Ծիծեռնակաբերդի հուշահամալիրի անմար կրակի մոտ: Նախաձեռնության հեղինակը Կրթության եւ գիտության նախարար Արմեն Աշոտյանն է, որն այսօր՝ ապրիլի 1-ին, Ծիծեռնակաբերդի բարձունքում ներկա էր արարողության մեկնարկին: (ֆոտոռեպորտաժ)
«Մեր աշակերտներն իրենց լուռ եւ ձիգ կեցվածքով կոգեկոչեն այն զոհերի հիշատակը, որոնց շարքերում կան իրենց տատերը, պապերը, նախահայրերը: Պատվո պահակի մասնակից աշակերտների մոտ կա հուզմունք, ապրումներ, պատմական հիշողություն, կա այստեղ կանգնելու՝ սգով շաղախված հպարտություն»,- ասաց Արմեն Աշոտյանը:
Արմեն Աշոտյանը նշեց, որ արողակարգը կարող է դառնալ ամենամյա եւ դրան մյուս տարի կմասնակցեն նաեւ մարզային դպրոցների աշակերտները:
Նախարարը դեմ չէ, որ պատվո պահակ կանգնելու համար աշակերտները բաց թողնեն դպրոցի դասերը։
«Իհարկե, որոշակի ժամեր իրենք կորցնում են, բայց կարծում եմ՝ արժե նախնիների հիշատակը ոգեկոչելու համար մի օր էլ դասի չնստել: Եթե կարելի է դասի չգնալ հիվանդության պատճառով, չարաճճիություն անել, դասից փախչել, կամ մի օր մեկ այլ անձնական պատճառով դասի չգնալ, որպես հայ, որպես Կրթության եւ գիտության նախարար կարծում եմ, որ կարելի է մեկ օր էլ չգնալ դասի, լինել այս հուշակոթողում եւ մասնակցել այս պատվո արարողությանը»- NEWS.am-ին ասաց նախարարը։
Նշենք, որ աշակերտները պատվո պահակ կկանգնեն ամեն օր մինչեւ ապրիլի 24-ը, առավոտյան 10։00-ից մինչեւ երեկոյան 18։00-ն։ Ամեն օր հերթափոխի պատասխանատուն կլինի մայրաքաղաքի դպրոցներից մեկը, աշակերտները չորս հոգանոց խմբերով միմյանց կփոխարինեն 30 րոպեն մեկ։
Լուսանկարները՝ Արսեն Սարգսյանի/NEWS.am