Մարտի 30-ին՝ երեկոյան, Հյուսիսային պողոտայում մոտ 10 երիտասարդներ ծեծի են ենթարկել 1-ին կարգի հաշմանդամություն ունեցող, երկու ձեռքերը անդամահատված Արտյոմ Առաքելյանին: Այս մասին NEWS.am-ի թղթակցի հետ զրույցում պատմեց Արտյոմ Առաքելյանը:
Նա Հյուսիսային պողոտայում երկու աղջկա հետ զբոսնում էր, երբ լսեց սեռական բնույթի ռեպլիկներ: «Ես մոտեցա, փորձեցի պարզել՝ արդյոք դրանք մեզ էին ուղղված, դրան ի պատասխան,սրանք ինձ հարվածեցին,գցեցին գետնին ու մոտ տասը հոգով սկսեցին դաժանորեն ծեծի ենթարկել,ու չգիտեմ ինչ կլիներ եթե ոստիկանները ժամանակին չմիջամտեին:Տասից յուրաքանչյուրը իր պարտքը համարեց ոտքերով գլխիս մի քանի ուժգին հարված հասցներ»,-ասաց երիտասարդը:
Նա նշեց, որ օգնության հասած ոստիկաններին հաջողվեց միայն նրանցից մեկին բռնել, պարզվել է, որ նա խմած է եղել: Երիտասարդը մտադիր է ամեն ինչ, որպեսզի բացահայտվեն իրեն ծեծի ենթարկողները: Նա սա որակում է որպես խուլիգանական արարք եւ շեշտում, որ այդ տարածքում բազմաթիվ տեսախցիկներ կան, որոնք արձանագրած կլինեն միջադեպը:
Այժմ Արտյոմ Առաքելյանի առողջական վիճակը նորմալ է, հարվածներ էր ստացել մարմնի տարբեր հատվածներում՝ գլխի, ձեռքերի, ոտքերի շրջանում: Նա նշեց, որ իրեն ծեծի ենթարկածները մինչեւ 25 տարեկան երիտասարդներ էին:
Ոստիկանությունից էլ NEWS.am-ի թղթակցին հայտնեցին, որ կատարվում է հետաքննություն, նշանակված է դատաբժշկական փորձաքննություն: