ԵՏՄ-ին անդամակցելու արդյունքը Հայաստանը կարող է զգալ արդեն 2015թ. ամռանը։ Այս մասին ապրիլի 1-ին Երեւանում Հայաստանի եվրասիական ինտեգրման հարցերով քննարկումների ժամանակ հայտարարել է ԱՄՀ երկրների ինստիտուտի (Մոսկվա) էկոնոմիկայի բաժնի ղեկավար Ազա Միհրանյանը։
Նրա խոսքով՝ այդ ժամկետները պայմանավորված են գյուղատնտեսական մթերքների արտահանման սեզոնի մեկնարկով, որը գործնականում կխթանի բանակցությունները։
«Հավանաբար արդեն լուծված կլինեն Լարսի «կանաչ միջանցքի» եւ լոգիստիկ մյուս պատուհանների խնդիրները։ Լուծված կլինեն արդյունաբերական համագործակցության հարցերը, որոնք այս պահին գտնվում են բանակցային փուլում։ Չնայած տեխնիկական կանոնակարգերի եւ վճարումահաշվարկային համակարգերի օգտագործման համաձայն իրականացվող ապրանքների ձեւակերպման բարդություններին՝ դրանք տեխնիկական հարցեր են եւ հետեւաբար՝ լուծելի են»,- հավելեց նա։