Հայաստանում գազատրանսպորտային ցանցի բոլոր մաշված խողովակները կարճ ժամանակում փոխելն իրատեսական չէ: Այս մասին, այսօր՝ ապրիլի 1-ին, լրագրողներին հայտնել է «Գազպրոմ Արմենիա» ընկերության գլխավոր տնօրենի տեղակալ եւ գլխավոր ինժեներ Հրանտ Թադեւոսյանը:
Նրա խոսքով՝ 2015 թվականին ընդհանուր առմամբ ընկերությունը կվերանորոգի կամ կփոխարինի տարբեր տրամաչափի 71 կմ խողովակ: Իսկ այսօր հանրապետությունում շահագործվում է 14 097 կմ խողովակ, որից 2 390 կմ-ն՝ ստորգետնյա:
«Մեր խողովակների տարիքը 35-40 տարեկան է, իսկ որոշ տեղերում հասնում է 50 տարվա: Դրանք պարզապես մաշվել են, բայց դրանց զանգվածային փոխարինում սկսելը նշանակում է նոր ծախսեր ներգրավել, որը սակագնի բարձրացում է ենթադրում: Մենք պատրա՞ստ ենք դրան»,-ասել է Թադեւոսյանը՝ հավելելով, որ 700 մմ տրամագծով մեկ կմ մայրուղային խողովակ գցելը գնահատվում է 1 մլն դոլար: Իսկ ընդհանուր ներդրումային ծրագիրը 2015-ին կկազմի 10 մլրդ 990 մլն դրամ: