ՀՀ գյուղատնտեսության նախարար Սերգո Կարապետյանն այսօր հրավիրել էր խորհրդակցություն ագրոարդյունաբերության ոլորտի միությունների ղեկավարների հետ:
«Գյուղատնտեսությունը մեր երկրի տնտեսության գերակա ճյուղերից մեկն է, սակայն նրա զարգացումն անհնար է պատկերացնել առանց ոլորտում գործող միությունների ակտիվ գործունեության», – նշել է նախարար Սերգո Կարապետյանը:
Մասնավորապես, նախարարի խոսքով, ագրոարդյունաբերության ոլորտի միություններին հարկավոր է մշակել իրենց ճյուղերի զարգացմանն ու ընդլայնմանն ուղղված համապատասխան ծրագրեր եւ սերտորեն համագործակցել պետական հատվածի հետ:
Նախարարը նաեւ հավելել է, որ միությունների գործունեության ակտիվացումը բխում է նաեւ պետության շահերից` նկատի ունենալով Հայաստանի` Եվրասիական տնտեսական միությանը անդամակցելու հանգամանքը:
Հանդիպմանը քննարկվել են նաեւ վերամշակող ճյուղի ներկա խնդիրները, որոնց թվում առանձնապես կարեւորվել է հայկական վերամշակող ընկերությունների արտադրանքի որակի բարելավումը, ինչը թույլ կտա ապահովել տեղական արտադրության մրցունակությունը ԵՏՄ երկրներում:
Անդրադառնալով հանրապետությունում վերջին տարիներին անասնագլխաքնակի աճին եւ դրանից բխող մսամթերքի արտադրության ծավալների ավելացմանը` նախարարը ներկաների ուշադրությունը հրավիրել է նաեւ տեղական մսի իրացման, ինչպես նաեւ տեղական մսամթերքի արտահանման խնդրի կարեւորությանը:
Քննարկմանը վերստին հաստատվել է, որ այս տարի եւս վերամշակող կազմակերպությունները պատրաստ կլինեն մթերել գյուղացիներից ամբողջ արտադրանքը:
