Մարդու դեմ ուղղված հանցագործությունները 2014թ. ընթացքում 200 դեպքով (2013թ.` 4,727 – 2014թ.` 4,927) աճել են: NEWS.am-ին տվյալներ են հայտնի դարձել Դատախազության 2014թ գործունեության հաշվետվությունից, որը օրերս ուղարկվել է ԱԺ նախագահին: Ընդ որում, աճել են սպանության (2013թ.` 48 – 2014թ.` 53), սպանության փորձի (2013թ.` 25 – 2014թ.` 28) դիտավորությամբ առողջությանը ծանր վնաս պատճառելու (2013թ.` 186 – 2014թ.` 216), բռնաբարության եւ բռնաբարության փորձի (2013թ.` 19 – 2014թ.` 22) եւ մարդու դեմ ուղղված այլ հանցագործությունների (2013թ.` 3,112 – 2014թ.` 3,420) դեպքերը: Նվազել են դիտավորությամբ առողջությանը միջին կամ թեթեւ վնաս պատճառելու (2013թ.` 1,412 -2014թ.` 1,321), մարդկանց թրաֆիքինգի (2013թ.` 14 – 2014թ.` 8), սեռական անձեռնմխելիության դեմ ուղղված հանցագործությունների (2013թ.` 116 – 2014թ.` 97) դեպքերը:
Մարդու դեմ ուղղված հանցագործությունների բացահայտման ցուցանիշում էական փոփոխություն չի արձանագրվել: 2014թ. բացահայտումը կազմել է 96%: Սպանության 53 դեպքից բացահայտվել է 45-ը, իսկ սպանության փորձերի դեպքերի բացահայտման ցուցանիշը նվազել է 13.4%-ով: 91 դեպքով նվազել են դիտավորությամբ առողջությանը վնաս պատճառելու դեպքերը, իսկ 30 դեպքով աճել են դիտավորությամբ առողջությանը ծանր վնաս պատճառելու դեպքերը:Բացասական միտում է նկատվել նաեւ նշված հանցագործությունների բացահայտման գործում, 2014թ. 216 բացահայտվել է 162-ը: Դիտավորությամբ առողջությանը ծանր վնաս պատճառելու 2013թ. արձանագրված 186 դեպքից չի բացահայտվել 30-ը, իսկ 2014թ. արձանագրված 216 դեպքից չի բացահայտվել 54-ը, բացահայտումը կազմել է ընդամենը 75%: