Կոտայքի մարզպետի պաշտոնը կվստահվի ԲՀԿ նախկին առաջնորդ Գագիկ Ծառուկյանի փեսային՝ Աբովյանի քաղաքապետ Կարապետ Գուլոյանին: NEWS.am-ին դեռ երեկ՝ ուշ երեկոյան, լուրեր էին հասել, որ այդ պաշտոնում կնշանակվի Ծառուկյանի փեսան: Վաղ առավոտից մենք փորձում ենք ճշտել մեզ հասած լուրերի իսկությունը, բայց ապարդյուն: Կարապետ Գուլոյանը չի պատասխանում հեռախոսազանգերին, իսկ քաղաքապետարանից այս լուրերը ոչ հերքեցին, ոչ հաստատեցին՝ խորհուրդ տալով սպասել 2 ժամ եւ հավելելով, որ նման խոսակցություններ միշտ եղել են: Հարցին, թե այսօր Կարապետ Գուլոյանը կմասնակցի Կառավարության նիստին, մեզ փոխանցեցին, որ պաշտոնական հրավեր չեն ստացել:
Կառավարության նիստի այսօրվա օրակարգում այդ հարցը այս պահի դրությամբ ընդգրկված չէ:
Նշենք, որ Գագիկ Ծառուկյանի՝ ԲՀԿ-ից եւ ակտիվ քաղաքականությունից հեռանալուց հետո ԲՀԿ-ից դուրս գալու դիմում էին գրել թե Կարապետ Գուլոյանը, թե նրա հայրը՝ պատգամավոր Մուրադ Գուլոյանը:
Հիշեցնենք, որ այսօր Կառավարության նիստում Կոտայքի մարզպետ Արամ Հարությունյանին պաշտոնանկ կանեն: Նա կարող է նշանակվել Ջրային տնտեսության պետական կոմիտեի ղեկավար: Դեռեւս նոյեմբերի 21-ին իր դիմումի համաձայն աշխատանքից ազատվել էր կոմիտեի նախագահ Վահե Հակոբյանը:
