Ռուսաստանում քննիչներն ուսումնասիրում են Օխոտի ծովում խորտակված «Հեռավոր Արեւելք» նավի սեփականատեր ընկերության փաստաթղթերը: Այդ մասին «Ռիա Նովոստիի»-ն հայտնել է ՌԴ ՔԿ Հեռավոր Արեւելքի քննչական վարչության ներկայացուցիչ Օքսանա Պոլշակովան:
«Քրեական գործ է հարուցվել: Հիմա քննիչները վերծանում են նավի տեխնիկական վիճակին, նավարկության դուրս գալու իրավունքին վերաբերող փաստաթղթերը: Նախատեսվում է նաեւ հարցաքննել անձնակազմի անդամներին»,- ասել է Պոլշակովան: Վերջինիս խոսքով` գերատեսչության ներկայացուցիչներն այժմ քննում են դեպքի բոլոր մանրամասները:
Հիշեցնենք, որ Օխոտի ծովի ջրերում այսօր՝ ապրիլի 2-ի գիշերը, խորտակվել է «Հեռավոր Արեւելք» ձկնորսական նավը, ինչի հետեւանքով զոհվել է 54 մարդ, անհետ կորած է համարվում 16 ձկնորս:
