Ոստիկանության Տավուշի մարզային վարչության եւ Դիլիջանի բաժնի ծառայողները Դիլիջանի Սայաթ-Նովայի փողոցից, գողություն կատարելու կասկածանքով, բերման են ենթարկել 17-ամյա Մարտուն Մ.-ին, 20-ամյա Թաթուլ Ս.-ին եւ 17-ամյա Ռուբեն Գ.-ին:
Ոստիկանության մամուլի ծառայությունից հայտնում են, որ Մարտուն Մ.-ն եւ Թաթուլ Ս.-ն խոստովանական բացատրություն են տվել, որ 2014 թ. հունվար ամսին, դուռը բանալիով բացելով, մտել են մի շինություն եւ գողացել օղի թորելու սարք:
Նյութերի նախապատրաստման ընթացքում բացահայտվել են նաեւ եռյակի հեղինակած մի շարք հանցադրվագներ: Այսպես.
- Մարտուն Մ.-ն, Թաթուլ Ս.-ն եւ Ռուբեն Գ.-ն 2014 թ. մայիսից մինչեւ հոկտեմբերն ընկած ժամանակահատվածում երեք անգամ ցանկապատի վրայով մուտք են գործել Դիլիջանի Սայաթ-Նովայի փողոցի տներից մեկն ու գողացել լատունե եւ երկաթե փականներ, պղնձե լարեր, պղնձե կաթսա,
- Մարտուն Մ.-ն եւ Թաթուլ Ս.-ն 2014 թ. սեպտեմբերին մետաղյա ձողով դռան կողպեքը կոտրելով՝ մուտք են գործել մի շինարարական կազմակերպության պատկանող շինություն եւ գողացել 15 մետր պղնձե հաղորդալար,
- Մարտուն Մ.-ն եւ Թաթուլ Ս.-ն 2014 թ. ամռանից մինչեւ 2015 թ. փետրվարն ընկած ժամանակահատվածում ցանկապատի վրայով հինգ անգամ մուտք են գործել Դիլիջանի Սայաթ-Նովայի փողոցում գտնվող մի կազմակերտության տարածք եւ գողացել պղնձե մալուխ, պղնձե խողովակներ, ալյումինե լարեր, ալյումինե տարաներ եւ լուսամփոփ,
- Մարտուն Մ.-ն եւ Թաթուլ Ս.-ն 2014 թ. հունվարից մինչեւ 2015 թ. մարտի 30-ն ընկած ժամանակահատվածում հինգ անգամ մուտք են գործել Սայաթ Նովա փողոցի թիվ 28 հասցեում գտնվող տան նկուղ եւ գողացել էլեկտրական շարժիչներ, պղնձե հաղորդալար:
Գողոնը մասամբ առգրավվել է:
Նշանակվել են ապրանքագիտական փորձաքննություններ:
Կատարվում է քննություն:
