Հայերի մոտ մեռելոցի իրավունքը հարգում էր անգամ Երեւանի խանը։ Այս մասին ապրիլի 2-ին կայացած Կառավարության նիստում հայտարարել է Տեր Արշակ եպիսկոպոս Խաչատրյանը, որին հրավիրել էին ներկա գտնվելու նիստին։
Նա համաձայն չէ, որ տաղավար տոներից հետո երկուշաբթիները պետք է աշխատանքային լինեն։ «Հնարավոր է, որ Հայաստանում ոչ աշխատանքային օրերի օրացույցը ծանրաբեռնված է եւ այն պետք է վերանայել, սակայն ոչ մեր ազգային ինքնության հաշվին, որի անբաժանելի մասը հանգուցյալների հիշատակը հարգելն է եւ նրանց հանդեպ հատուկ վերաբերմունքը։ Չէ՞ որ Եկեղեցին նրանց համարում է Քրիստոսի մեջ հավերժ ապրող»,- հայտարարեց եպիսկոպոսը՝ նշելով, որ ննջեցյալների գերեզմաններ այցելելու հայերի իրավունքը հարգում էին անգամ այլադավան զավթիչները, այդ թվում՝ պարսկական գերիշխանության օրոք Երեւանի խաները։
Նրա կարծիքով՝ հայ հասարակության ճնշող մեծամասնությունը կողմ է ոչ աշխատանքային երկուշաբթիներին, պարզապես որոշ ընդդիմադիրների ձայներն ավելի բարձր են հնչում։