Հռոմի Պապը ապրիլի 12-ին պատարագ կմատուցիՀայոց ցեղասպանության անմեղ զոհերի հիշատակին, եւ բոլորի ուշադրությունը հրավիրված կլինի այն հանգամանքին, թե կարտասանի՞ նա Ցեղասպանություն բառը, գրում է Agence France Presse-ը։
Հռոմի Պապը պատարագ կմատուցի Սուրբ Պետրոսի տաճարում, որը հայկական կաթոլիկ ծեսի տարրեր է պարունակում։ Արարողությանը ներկա կլինի նաեւ ՀՀ նախագահ Սերժ Սարգսյանը։ «Վատիկանը պատարագն այնպես է մատուցում, որ ներկաները հասցնեն տուն վերադառնալ ապրիլի 24-ին կայանալիք հիշատակի միջոցառումներին մասնակցելու համար»,- գրում է հեղինակը։
Ինչպես նշվում է հոդվածում, եթե Հռոմի Պապը արտասանի ցեղասպանություն բառը, դա առաջին նախադեպը չի լինի։ Նման բան արդեն կատարվել էր 2000թ., երբ Հովհաննես Պողոս 2-րդը հայ կաթողիկոսի հետ արած համատեղ հայտարարության մեջ օգտագործել էր այդ բառը։ «Սակայն առաջին անգամ այդ սպանությունները ցեղասպանություն կորակվեն Սուրբ Պետրոսի տաճարում մատուցվող պատարագի ժամանակ»,- գրված է հոդվածում։
Փորձագետների խոսքով՝ Ֆրանցիսկոս Պապը, որն արդեն ընդգծել էր հայերի տառապանքներն ու հալածանքները հիշելու կարեւորությունը, կարող է աշխարհում քրիստոնյաների աճող հալածանքների հետ զուգահեռներ անցկացնել։ «100 տարի առաջ սպանված մարդիկ հիմնականում հայեր էին եւ թեեւ սպանությունները կրոնական հողի վրա չէին կատարվում, պոնտիֆիկոսն արդեն համեմատել է դրանք այսօր իսլամիստ գրոհայիններից փախչող քրիստոնյաների հետ»,- եզրափակում է հեղինակը։
