Կարմիր բլուր հնավայրի հարակից տարածքում նոր պուրակ կհիմնվի:
Ծառատունկի շրջանակում Կարմիր բլուր հնավայրի հարակից շուրջ 1 հա կազմող տարածքում եւս նոր տնկիներ են տնկվել: Բազմաթիվ բնակիչների հետ միասին նշված վայրում ծառատունկին մասնակցել է նաեւ քաղաքապետ Տարոն Մարգարյանը: Նոր տնկիներով համալրված տարածքը՝ համաձայն նախագծի ու ներկայացված էսքիզների, առաջիկա տարիներին կդառնա մայրաքաղաքի հարմարավետ պուրակներից մեկը:
«Շուրջ 1 հեկտար այս տարածքում, որտեղ իրականացրեցինք ծառատունկը, համոզված եմ, որ մի քանի տարի անց կդառնա մայրաքաղաքի հերթական գեղեցիկ պուրակներից մեկը: Կարծում եմ էսքիզները նայելով դուք նույնպես որոշակի պատկերացում կազմեցիք, թե ինչպիսի հանգստի գոտի կդառնա այս վայրը: Ընդհանրապես, սա մեր որդեգրած քաղաքականության համատքստում է եւ մենք, ինչպես եւ խոստացել էինք, շարունակաբար ավելացնելու ենք մայրաքաղաքի կանաչ տարածքները»,- ընդգծել է քաղաքապետը:
Որպես ծրագրային առաջնահերթություն կարեւորված է մայրաքաղաքի ընդհանուր օգտագործման կանաչ տարածքների վերականգնումն ու ընդլայնումը, որոնց ուղղությամբ, ինչպես նշել է քաղաքապետը, զգալի աշխատանքներ են տարվել: Միայն վերջին երկու տարիների ընթացքում Երեւանում տնկվել է ավելի քան 127 հազար ծառ եւ թուփ: Եվս 30 հազար ծառ եւ 8000-ից ավելի թուփ էլ կտնկվի այս տարվա գարնանային ծառատունկի շրջանակում: Ի դեպ, մինչեւ ապրիլի 26-ը կտնկվի նաեւ շուրջ 20 հազար վարդի թուփ:
«Ծառատունկ իրականացնելուց բացի շատ կարեւոր է նաեւ տնկիների խնամքը: Համոզված եմ նկատել եք, որ արդեն մի քանի տարի է, ինչ մենք ծառատունկն իրականացնում ենք բացառապես ոռոգելի տարածքներում: Այս համատեքստում ուզում եմ նաեւ նշել, որ վերջին երկու տարիներին շուրջ 63 կմ ոռոգման նոր ցանց ենք կառուցել: Եվս շուրջ 20 կմ նոր ոռոգման ցանց կկառուցենք այս տարի», - նշել է քաղաքապետ Տարոն Մարգարյանն ու հավելել, որ ինչպես նախորդող տարիներին, այնպես էլ այս տարի ոռոգման ցանցի ընդլայնման ուղղությամբ աշխատանքներում ներառված կլինեն նաեւ մայրաքաղաքի բակային տարածքները:
Նոր հիմնվող պուրակում կազմակերպված ծառատունկին մասնակցել են նաեւ Երեւանի ավագանու «Հանրապետական կուսակցություն» խմբակցության անդամները:
