Հայաստանը կարող է շատ բարենպաստ պայմաններ ստեղծել իտալական ընկերությունների համար, որոնք ցանկանում են աշխատել ԵՏՄ շուկայում: Այս մասին այսօր՝ ապրիլի 11-ին, իտալական խոշորագույն Rai հեռուստառադիոընկերությանը տված հարցազրույցում հայտարարել է ՀՀ նախագահ Սերժ Սարգսյանը՝ պատասխանելով ԱՊՀ հարցերով հայտնի մեկնաբար Մարկ Իննարոյի հարցին:
«Այսօր Հայաստանը ԵՏՄ մի մասն է: Դա նշանակում է, որ մեր հանրապետությունն արդեն ոչ թե 3-միլիոնանոց փոքրիկ շուկա է, այլ մեծ շուկայի մաս, որտեղ նվազագույնը 173 մլն սպառող ունի: Հայաստանում գործող ցանկացած ձեռնարկություն կարող է ազատորեն ապրանք արտահանել Ռուսաստան, Բելառուս ու Ղազախստան՝ առանց մաքսատուրքերի եւ զգալի հարկային արտոնություններով»,-վստահեցրել է ՀՀ նախագահը:
«Հայաստանի առավելություններից մեկն էլ զգալի մարդկային կապիտալն է, որակյալ տեխնիկական մասնագետների առկայությունը: Դա նշանակում է, որ մեզ մոտ շատ բարենպաստ պայմաններ են իտալական ընկերությունների համար, որոնք կարող են այստեղ շատ հանգիստ աշխատել ու արտադրել»,-հավելել է Սերժ Սարգսյանը: