Ապրիլի 13-ին արտգործնախարար Էդվարդ Նալբանդյանն ընդունեց Ռուսաստանի փոխարտգործնախարար Ալեքսեյ Մեշկովին, ով Երեւան է ժամանել արտգործնախարարությունների միջեւ խորհրդակցությունների անցկացման կապակցությամբ։

Ողջունելով հյուրին՝ նախարար Նալբանդյանը բարձր գնահատեց Հայաստանի եւ Ռուսաստանի արտաքին գերատեսչությունների միջեւ հաստատված արդյունավետ փոխգործակցությունը, որը հայ-ռուսաստանյան դաշնակցային հարաբերությունների բաղկացուցիչ մասն է կազմում։ Նախարարը կարեւորեց միջազգային կազմակերպությունների շրջանակներում փոխգործակցությունը՝ ընդգծելով, որ անցյալ շաբաթ Մոսկվա կատարած իր այցելությունը լավ առիթ էր անդրադառնալու նաեւ այդ բնագավառում համագործակցության հարցերին։

Շնորհակալություն հայտնելով ընդունելության համար՝ Ալեքսեյ Մեշկովը անդրադարձավ ԱԳՆ-ների միջեւ կայացած խորհրդակցությունների արդյունքներին։

Հանդիպմանը մտքեր փոխանակվեցին եվրոպական կազմակերպությունների շրջանակներում երկկողմ փոխգործակցության, եվրոպական կառույցների հետ Հայաստանի եւ Ռուսաստանի համագործակցության շուրջ։