Վրաստանի Հանրապետությունում՝ Բագրատաշեն - Սադախլո մաքսային կետում, Հայաստանից Ռուսաստան ուղեւորվող «Ֆորսաժ-Տուր» տուրիստական կազմակերպությանը պատկանող ավտոբուսի վարորդը ապրիլի 12-ին տեղի ունեցած միջադեպում մեղավորություն չի ունեցել: Այս մասին NEWS.am-ի հետ զրույցում ասաց «Ֆորսաժ-Տուր» տուրիստական կազմակերպության ղեկավար Կարեն Թադեւոսյանը՝ նշելով, որ վարորդին անտեղի 8 ժամ պահել են ոստիկանությունում:
«Վարորդն ուղղակի անցակետի աշխատակիցներին խնդրել է, որ ուղեւորները մեղք են, մի քիչ շուտ կարողանան անցնել, անցակետի աշխատողներն էլ պատասխանել են, որ ինչքան պետք է, այնքան էլ կսպասեն»,-ասաց նա:
Ավտովոբուսի ուղեւորներից Բորիս Թադեւոսյանը NEWS.am-ի հետ զրույցում պատմեց, որ ավտոբուսի վարորդը որեւէ խախտում չի կատարել, ընդհակառակը միջադեպը հրահրել են անցակետի աշխատողները:
«Մեր վարորդը խնդրեց, որ չուշացնեն մեզ, իրենք էլ կոպիտ պատասխանեցին, ասացին ինչքան ուզենք, կպահենք ձեզ: Հետո աշխատողներից երկուսը վարորդին հրեցին, նա ընկավ, հետո վարորդը բարձրացավ նրանց, հրեց: Իրենք էլ վարորդին քաշելով տարան: Իրենց անցակետի աշխատողները հարբած էին, նույնիսկ մեր ուղեւորներից մեկին էլ խփեցին, տարիքով մարդ էր, ընկավ: Այդ ժամանակ մի տարեց կին վատացավ, նույնիսկ «Շտապօգնության» մեքենա կանչեցին, որն օգնություն ցույց տվեց նրան»,-ասաց Թադեւոսյանը՝ նշելով, որ իրենք 8 ժամ սպասել են անցակետում:
Նա նշեց, որ 3 ուղեւորի ծխելու համար տուգանել են՝ չնախատեսված վայրում ծխելու համար:
Նշենք, որ ուղեւորներն բարեհաջող տեղ են հասել, վարորդն էլ արդեն վերադարձել է Հայաստան,:
Ավելի վաղ NEWS.am-ը հաղորդել էր, որ ապրիլի 12-ին, ժամը 20.51-ին ահազանգ է ստացվել, որ Վրաստանի Հանրապետությունում՝ Բագրատաշեն - Սադախլո մաքսային կետում, Հայաստանից Ռուսաստան ուղեւորվող «Ֆորսաժ-Տուր» տուրիստական կազմակերպությանը պատկանող ավտոբուսի վարորդ՝ ՌԴ քաղաքացի Կ.Ա.-ի եւ Վրաստանի Հանրապետության սահմանային կետի աշխատակիցների միջեւ ծագած վիճաբանության արդյունքում Կ.Ա.-ը ձերբակալվել է եւ տեղափոխվել Մարնեուլիի ոստիկանության բաժանմունք: Ավտոբուսի 50 ուղեւորներ մնացել են սահմանային կետում եւ չեն կարողանում շարունակել ընթացքը: Ժամը 00.20-ին վարորդն ազատ է արձակվել եւ ավտոբուսը շարունակել է իր ընթացքը: