ՀՀ գյուղատնտեսության նախարար Սերգո Կարապետյանն այսօր այցելել է Արարատի մարզի Դարակերտ համայնքում գործող ՀՀ ԳՆ «Բանջարաբոստանային եւ տեխնիկական մշակաբույսերի գիտական կենտրոն» ՊՈԱԿ` կենտրոնի ընթացիկ աշխատանքներին ծանոթանալու նպատակով:
Դրական գնահատելով հատկապես վերջին տարիներին կենտրոնի գործունեությունը` նախարարն ընդգծել է, որ բանջարաբոստանային եւ տեխնիկական մշակաբույսերի տեղական սորտերի մշակության ուղղությամբ տարվող աշխատանքները տարեց տարի ավելի բարեհաջող են ընթանում, ինչի շնորհիվ սերմնաբուծության ոլորտում տարեկան հաջողվում է ապահովել 30-40 տոկոս աճ:
«Մեզ համար գերակա խնդիր է մնում տեղական սերմնաբուծության արտադրության ծավալների ավելացման հաշվին ավելացնել բանջարաբոստանային մշակաբույսերի տեղական սորտերի տարածումը մեր հանրապետությունում», – նշել է նախարարը` հավելելով, որ այդ ուղղությամբ կենտրոնը սերտորեն համագործակցում է նաեւ մասնավոր հատվածի հետ:
Նախարարը հայտնել է, որ ընթացիկ տարվա աշնանը կենտրոնում հոսքային գծերի տեղադրման եւ աշխատանքի մեքենայացման շնորհիվ հնարավոր կլինի առաջիկա տարիներին տեղական սորտերի սերմերի նկատմամբ առկա պահանջարկի մոտ 80 տոկոսն ամբողջությամբ բավարարել գիտական կենտրոնի արտադրության հաշվին:
Տեղեկացնելով, որ բանջարաբոստանային մշակաբույսերի թվում ներկայումս հանրապետությունում առավել մեծ պահանջարկ ունի հատկապես լոլիկը, Սերգո Կարապետյանը նշել է, որ այս տարի նախատեսվում է 2500 հեկտարով ավելացնել լոլիկի ցանքատարածությունները:
Իր հերթին գիտական կենտրոնի տնօրեն Գայանե Սարգսյանը նշել է, որ գյուղացիական տնտեսությունները մեծ հետաքրքրություն են ցուցաբերում տեղական սորտերի նկատմամբ, եւ համոզմունք է հայտնել, որ կենտրոնում արտադրվող սերմերն ամբողջությամբ կսպառվեն:
Նշելով, որ այսօր գիտական կենտրոնն ունի բանջարաբոստանային եւ տեխնիկական մշակաբույսերի 3620-ից ավելի սորտեր, այդ թվում` 40-ից ավել լոլիկի սորտեր, որոնցից առավել մեծ պահանջարկ ունեն մասնավորապես «Անահիտ», «Արա», «Նոյ», «Հայաստանի հրաշք», «Երազ» եւ «Մուսա լեռ» տեսակները:
Սերմերի պահանջարկը եւ արտադրության ծավալները բավարարելու համար գիտական կենտրոնը համագործակցում է նաեւ մասնավոր տնտեսությունների հետ:
Բացի սերմարտադրությունից, գիտական կենտրոնն արդեն երրորդ տարին է, ինչ սածիլներ է աճեցնում, որոնք հետագայում իրացվում են հանրապետության բոլոր մարզերում:
