Իրանին C-300 համալիրներ մատակարարելու Ռուսաստանի որոշումը «անհանգստություն է առաջացնում ԵՄ-ում», բայց Եվրահանձնաժողովը համարում է, որ դա չի ազդի Իրանի միջուկային ծրագրի շուրջ բանակցությունների ընթացքի վրա: Այս մասին, այսօր՝ ապրիլի 14-ին, հայտարարել է ԵՄ արտաքին գործերի եւ անվտանգության քաղաքականության հարցերով բարձրագույն ներկայացուցիչ Ֆեդերիկ Մոգերնիի մամուլի քարտուղար Քաթրին Ռեյը, հաղորդում է ՏԱՍՍ-ը:
«Մենք ի գիտություն ընդունեցինք ՌԴ որոշումը՝ Իրանին C-300 հրթիռներ մատակարարելու հնարավորության վերաբերյալ: Սա նոր սյուժե չէ: Մենք հայտնել ենք ու հիմա էլ հայտնում ենք մեր անհանգստությունը, բայց կարծում եմ, որ այդ որոշումը չի ազդի Իրանի միջուկային ծրագրի շուրջ բանակցությունների վրա, որոնք պետք է ավարտվեն հունիսին համապարփակ համաձայնագրի կնքմամբ»,-ասել է նա: