Հայաստանի կրթության եւ գիտության նախարար Արմեն Աշոտյանն այսօր Երեւանի  Վ. Պետրոսյանի անվան թիվ 51  հիմնական դպրոցում ներկա է գտնվել  Հայոց ցեղասպանության 100-րդ տարելիցին նվիրված միջոցառմանը: Հուշ երեկոն կրել է   ցեղասպանության 100-րդ տարելիցի պետական միջոցառումների  «Հիշում եւ պահանջում ենք» խորագիրը: Միջոցառմանը ներկա են  եղել նաեւ Երեւանի քաղաքապետ Տարոն Մարգարյանը, Երեւանի ավագանու անդամներ, հայտնի մշակույթի գործիչներ, աշակերտներ եւ ծնողներ:

Ցերեկույթից հետո լրագրողների հետ զրույցում ՀՀ կրթության եւ գիտության նախարար  Արմեն Աշոտյանն իր խոսքում նշել է, որ հանրապետության դպրոցներում ցեղասպանության հիշատակին նվիրված միջոցառումներն սկսվել են հունվարից եւ շարունակվելու են մինչեւ դեկտեմբեր. «Ցեղասպանության 100-րդ տարելիցի շրջանակում անցյալ շաբաթ  դպրոցականները պատրաստեցին անմոռուկներ: Դրանք փոխանցվելու են միջոցառումներն համակարգող պետական հանձնաժողովին, որպեսզի բաժանվեն  ապրիլի 24-ին Երեւան այցելած հյուրերին: Ծրագրով  ավագ դպրոցներում նախատեսված են նաեւ բաց դասեր՝ նվիրված  Հայոց ցեղասպանության 100-րդ տարելիցի համահայկական հռչակագրի դրույթների քննարկմանը: Մինչեւ տարվա վերջ  կկազմակերպվեն նաեւ շարադրությունների եւ նկարչական մրցույթներ, ինչպես նաեւ գեղարվեստական հուշ-երեկոներ: Նման միջոցառումները հաշվետվության նպատակով չեն արվում, դրանք ունեն դաստիարակչական նշանակություն եւ առաջին հերթին դպրոցականների համար են: Վստահ եմ՝  բեմից իրենց բաժին  ընկած հատվածն արտասանող երեխաները նույն տողերը հիշելու են նաեւ կյանքի հասուն տարիներին՝ այն գիտակցմամբ, որ իրենք  եղել են  պետական միջոցառումների մի մասնիկը»,- իր խոսքում նշել է նախարարը եւ հավելել, որ տարվա ընթացքում այցելություններ են լինելու նաեւ այլ դպրոցներ:

Լուսանկարները՝  Արսեն  Սարգսյանի/NEWS.am