Երեւանի քննչական վարչության Ավան եւ Նոր Նորք վարչական շրջանների քննչական բաժնում շարունակվում է Ն. եւ Հ. Սամսոնյանների, Տ.Սարգսյանի նկատմամբ բռնություն գործադրելու դեպքի առթիվ հարուցված քրեական գործի նախաքննությունը, ձեռնարկվում անհրաժեշտ քննչական եւ դատավարական միջոցառումներ՝ առերեւույթ հանցագործություն կատարած անձանց շրջանակը պարզելու ուղղությամբ։
Ավելի վաղ քննչական կոմիտեն տեղեկացրել էր, որ քաղաքացիներ Նարեկ եւ Հարություն Սամսոնյանները, Տ.Սարգսյանը գրավոր հաղորդում են ներկայացրել, որ առերեւույթ հանցագործություն կատարած անձը (անձինք) 2015 թվականի մարտի 23-ին՝ ժամը 02-ի սահմաններում, Ավան վարչական շրջանում մահակներով եւ կռփազենքերով հարվածներ է հասցրել Ն. եւ Հ. Սամսոնյանների, Տ.Սարգսյանի գլխի եւ մարմնի տարբեր մասերին։ Հարվածների հետեւանքով վերջիններիս պատճառվել են մարմնական վնասվածքներ։
Տուժած քաղաքացիներին պատճառված վնասվածքների աստիճանը պարզելու համար Ավան եւ Նոր Նորք վարչական շրջանների քննչական բաժնում հարուցված քրեական գործով նշանակվել են դատաբժշկական փորձաքննություններ։ Հաշվի առնելով հանրության հետաքրքրությունը՝ տեղեկացնում են, որ քրեական գործով ստացվել են Ն. եւ Հ. Սամսոնյանների նկատմամբ նշանակված դատաբժշկական փորձաքննությունների եզրակացությունները։ Փորձագետների գնահատմամբ՝ վնասվածքների հետեւանքով Հ.Սամսոնյանի առողջությանը պատճառվել է միջին ծանրության վնաս, իսկ Ն.Սամսոնյանին պատճառված վնասվածքի աստիճանը վերջնական որոշելու համար վերջինս փորձագետների կողմից կրկին հրավիրվել է հետազոտության՝ դեպքից 21 օր անց։
Քրեական գործով որպես մեղադրյալ է ներգրավվել 1 անձ, ձեռնարկվում են անհրաժեշտ քննչական եւ դատավարական միջոցառումներ դեպքի բոլոր հանգամանքների բազմակողմանի հետազոտումն ապահովելու, Ն. եւ Հ. Սամսոնյանների, Տ.Սարգսյանի նկատմամբ կիրառված բռնությանը հնարավոր այլ անձանց մեղսակցությունը, նրանց ինքնությունը պարզելու ուղղությամբ։
