Հայոց ցեղասպանության միջազգային ճանաչման համար հայ ժողովրդի պայքարը ոչ միայն հայերի, այլեւ ամբողջ աշխարհի պայքարն է:
Ըստ «Prensa Armenia»-ի, այս մասին հարցազրույցներից մեկում հայտարարել է ուրուգվայցի հայտնի գրող, ակտիվիստ, մարդու իրավունքների եւ Հայոց ցեղասպանության ճանաչման պաշտպան Էդուարդո Գալեանոն: Բացի այդ, գրողն իր «Հայելիները» գրքում անդրադարձել է 1915 թվականի իրադարձություններին:
Պարբերականը նաեւ գրքից հատվածներ է ներկայացնում.
«Անպատժելիությունը մոլորության դուստրն է:
Մինչ ընթանում էր Առաջին համաշխարհային պատերազմը, օսմանյան կառավարությունն իրականացնում էր հայերի ծրագրված կոտորածը, որի արդյունքում ոչնչացվեց Թուրքիայի հայերի կեսը:
- թալանված եւ այրված տներ;
- մերկ մարդկանց ամբոխ՝ առանց ջրի եւ սննդի ճանապարհներին լքված;
- օրը ցերեկով քաղաքի հրապարակում բռնաբարված կանայք;
- գետերում լողացող կտտանքների ենթարկված մարմիններ:
Ովքեր չմահացան քաղցից, ծարավից կամ ցրտից, մահացան սրից կամ փամփուշտից: Կամ կախաղան հանվեցին: Կամ զոհվեցին ծխից… սիրիական անապատում: Թուրքիայից արտաքսված հայերին քշեցին քարանձավները, որտեղ նրանք խեղդվեցին ծխից: Դա նման էր նացիստական Գերմանիայի գազի խցիկներին:
20 տարի անց Հիտլերը խորհրդականների հետ ծրագրեց Լեհաստան ներխուժումը: Կշեռքի նժարին դնելով գործողության դրական եւ բացասական կողմերը՝ Հիտլերը նախազգուշացրեց բողոքի, միջազգային սկանդալի մասին, սակայն հավաստեց, որ բարձրացված աղմուկը երկար չի տեւի:
- Ո՞վ է այսօր հիշում հայերի մասին,- իր խոսքերը հաստատեց նա»:
