Արմավիրի մարզում բոլորն ապշած են 51-ամյա Հայկարամ Արամայիսի Գրիգորյանի սպանության լուրից: Ընտանիքն ապրում է Էջմիածնում, սակայն գրանցված է Արեւիկ գյուղում, որտեղ ունեն տուն, հողամաս:
Գյուղապետ Գառնիկ Ծատուրյանը NEWS.am-ի թղթակցի հետ զրույցում ասաց, որ սպանվածը երկու որդի ունի, մեկն ամուսնացած է, ապրում է ԱՄՆ-ում, վերջերս վերադարձել եւ կնքել է երեխաներին, մյուս որդուն էլ առաջիկայում պետք է նշաներ:
Գյուղապետը նշեց, որ տարիներ առաջ Հայկարամ Գրիգորյանը դատապարտվել է, ինչ-որ փողերի հետ կապված խնդիր է եղել՝ վիճաբանություն, նրա հայրը եղել է Էջմիածնի «ԳԱԻ» պետ, այժմ մահացած է, հորեղբայրը Արմավիրում դատավոր էր աշխատում: Այժմ առավել հայտնի է Հայկարամ Գրիգորյանի եղբայրը՝ Հայկազ Գրիգորյանը, ով Գառնիկ Ծատուրյանի փոխանցմամբ, մեծ բիզնեսներ ունի արտերկրում, օգնում էր բոլորին: Իսկ սպանվածը զբաղվում էր տարբեր գործերով, օգնում էր եղբորը բիզնեսների հարցում, գյուղատնտեսությամբ էր զբաղվում:
Գառնիկ Ծատուրյանն ասաց, որ Հայկարամ Գրիգորյանը շատ նորմալ, աշխույժ մարդ էր, բոլորի հետ շփվող, նրանք պատկերացում անգամ չունեն, թե ինչը կարող էր լինել սպանության պատճառ:
Ավելի վաղ հայտնել էինք, որ ապրիլի 15-ին` ժամը 01:30-ին, շտապօգնության կայանից ոստիկանության Վաղարշապատի բաժնում հաղորդում է ստացվել, որ Էջմիածին քաղաքի Չարենցի թաղամասի 4-րդ շենքի բակում տղամարդ է մահացել: Ոստիկանության մամուլի ծառայությունից հայտնել են, որ մեկնած օպերատիվ խումբը Էջմիածին քաղաքի Չարենց թաղամասի 4-րդ շենքի բակում հայտնաբերել է նախկինում դատված 51-ամյա Հայկարամ Գրիգորյանի դիակը` գլխի շրջանում հրազենային վնասվածքներով, իր վարած «INFINITI QX 4» մակնիշի ավտոմեքենայի կողքին ընկած: Նրա մարմինն ամբողջությամբ արյունոտ է եղել: Կատարվում է քննություն:
