Հայաստանի կառավարությունը արժեզրկում է Համահայկական բանկի գաղափարը՝ նրան պարապուրդի մատնելով։ Այս մասին ապրիլի 15-ին լրագրողներին հայտնել է տնտեսագիտական գիտությունների դոկտոր Թաթուլ Մանասերյանը։ Նրա խոսքով՝ բանկը պետք է հանրությանը հաշվետու լինի։ Թղթի վրա Համահայկական բանկն արդեն մի քանի տարի աշխատում է, սակայն ոչ մի արդյունք չկա։ «Աստված տա, որ ես սխալվեմ։ Դա ուղղակի հերթական չաշխատող նախագիծը չէ։
Արժեզրկվում է հենց գաղափարը, որը նպատակ ուներ ներդրումներ գրավել արտասահմանում ապրող հայրենակիցներից ոչ միայն հանուն հայրենիքի, այլ պոտենցիալ շահավետ նախագծերով։ Այս գաղափարի արժեզրկումը նշանակում է քանդել Հայաստանը որպես ներդրումների վայր եւ թողնել այն միայն հանգստի գոտի»,- հայտարարել է Մանասերյանը՝ նշելով, որ բանկի ճակատագրի մասին նա վերջին ամիսների ընթացքում մի քանի անգամ հայտարարել է, սակայն պատասխան չի ստացել։ «Պատասխան պահանջողը պետք է հասարակությունը լինի, քանի որ հարցը բոլորին է վերաբերում»,- ասել է նա։
Այն դիտարկմանը, որ Հայաստանում դեռեւս մշակված չէ ներդրումային բանկինգի օրենսդրությունը, Մանասերյանը նշել է. «Մեր խնդիրը տեսնելն է, թե արվել է որեւէ քայլ եւ դրանից հետո միայն ուշադրություն դարձնել դետալներին։ Դա նույնն է, թե հայտարարես, որ առաստաղից վեր չես ցատկի, բայց անգամ չփորձես մագլցել»։
Հիշեցնենք, որ «Համահայկական բանկ» ԲԲԸ-ն բացվել է 2011թ. սեպտեմբերին, սակայն նրա մասնակցությամբ որեւէ ներդրումային ծրագիր չի իրականացվել։
