Ցեղասպանությունը երբեք չպետք է օգտագործվի որպես քաղաքական կապիտալ դաշնակիցներին զսպելու համար։ Այս մասին ամերիկյան SPIN հեղինակավոր երաժշտական ամսագրին տված հարցազրույցում ասել է System of a Down ռոք խմբի մենակատար Սերժ Թանկյանը՝ խոսելով Հայոց Ցեղասպանության 100-ամյա տարելիցին նվիրված Wake Up the Souls շրջագայության մասին։
«Մենք հնարավորություն ենք ստացել 100-ամյա տարելիցի միջոցառումների շրջանակում ելույթ ունենալ Հայաստանում, եւ մենք այս հնարավորությունը կօգտագործենք, որպեսզի մարդկանց պատմենք այդ վայրագությունների, Թուրքիայի ամոթալի ժխտողական քաղաքականության եւ անցյալի հանցագործությունները վերհանելու անհրաժեշտության մասին։ Ժամանակը ցույց է տվել, որ Նյուրնբերգյան դատավարությունը, ՄԱԿ-ի կոնվենցիան եւ բազմաթիվ քաղաքական հանձնախմբերը բավարար չեն ցեղասպանությունները կանխելու համար։ Չկա որեւէ գործող մեխանիզմ, որը թույլ կտա նման ռեժիմը մեկուսացնել դաշնակիցներից։ Դեռ շատ անելիքներ կան»,- ասել է Սերժ Թանկյանը։
Սերժ Թանկյանը նշել է, որ իր ընտանիքը քաղաքականացված չի եղել, եւ ինքը քաղաքական ակտիվիստ է դարձել «ԱՄՆ-ի հայտնի ժողովրդավարության կեղծավորության արդյունքում», երբ ԱՄՆ-ը սկսել է օգտագործել Ցեղասպանությունը որպես քաղաքական կապիտալ Թուրքիայի հետ հարաբերություններում. «Դա բացեց իմ աչքերը աշխարհում կատարվող մյուս անարդարությունների վրա»։
Թանկյանը նաեւ նշել է, որ Թուրքիան իր լծակները եւ փողերը ծառայեցնում է ժխտողականությանը՝ խուսափելով փոխհատուցման, այդ թվում՝ զոհերի կորցրած սեփականությունը վերադարձնելու պատասխանատվությունից։