ՀՀ Կառավարությունը հավանություն է տվել Համաշխարհային բանկի 52 մլն դոլար արժողությամբ վարկային ծրագրին։ Գումարը նախատեսված է 220 կՎ հզորությամբ աշխատող 2 ենթակայանների կապիտալ վերանորոգման համար։ Եվս 17.16 մլն դոլար կհատկացնի Կառավարությունը։
Ենթակայաններից առաջինը՝ Արագածոտնի մարզի «Աշնակը», կառուցվել է 1983թ. եւ սպասարկում է մոտ 120 հազար սպառողի՝ բնակիչներ եւ ձեռնարկություններ։ Երեւանի ՋԷԿ ենթակայանի շուրջ իրավիճակը ավելի բարդ է. այն կառուցվել է 1965թ. եւ այնտեղ նույնպես կապիտալ վերանորոգում չի կատարվել։ Ենթակայանը սպասարկում է 1 մլն 40 հազար մարդու՝ գեներացում տալով Երեւանի ՋԷԿ-ին, որը ապահովում է երկրում էլեկտրաէներգիայի 20 տոկոսը։
Այս 2 խոշոր նախագծերից բացի ծրագիրը ենթադրում է նաեւ կառուցել էներգետիկայի նախարարության պահուստային դիսպետչերական կենտրոն, ինչը կկրճատի վթարային անջատումների եւ խոտանների ռիսկերը։