«Հիմնադիր խորհրդարանի» քարտուղարությունը հերքում է լուրերը, թե համաներումը հետաձգվում է «100-ամյակն առանց ռեժիմի» անդամների կալանավորման պատճառով:
Քարտուղարությունը հաղորդագրություն է տարածել, որում մասնավորապես ասվում է. «Ռեժիմն իրեն ենթակա քրեական եւ այլ տարրերի միջոցով արդեն մի քանի օր է, ինչ սկսել է ապատեղեկատվության տարածումը քրեակատարողական հիմնարկներում առ այն, որ «100-ամյակը առանց ռեժիմի» շարժման գործունեության եւ նրա անդամների կալանավորման պատճառով հետաձգվում է համաներման հայտարարումը:
Այս քայլով ռեժիմը փորձում է դատապարտյալների շրջանում բացասական վերաբերմունք ձեւավորել «100-ամյակը առանց ռեժիմի» շարժման գործունեության եւ նրա անդամների նկատմամբ՝դրանով իսկ հող նախապատրաստելով «100-ամյակը առանց ռեժիմի» շարժման կալանավորված անդամների նկատմամբ հնարավոր հոգեբանական եւ նույնիսկ ֆիզիկական ճնշումներ գործադրելու համար»: