Երեւանի Ավան համայնքի Ծարավ Աղբյուրի փողոցում այսօր՝ ապրիլի 16-ին, մեկնարկեց «Գազպրոմը՝ երեխաներին» ծրագրի շրջանակում կառուցվող ուսումնամարզական համալիրի շինարարությունը։ Հիմնարկեքի արարողությանը ներկա էին ՀՀ նախագահ Սերժ Սարգսյանը, Երեւանի քաղաքապետ Տարոն Մարգարյանը, ՀՀ-ում ՌԴ դեսպան Իվան Վոլինկինը, «Գազպրոմ» ԲԲԸ վարչության նախագահ Ալեքսեյ Միլլերը և «Գազպրոմ Արմենիա» ՓԲԸ վարչության նախագահ և գլխավոր տնօրեն Վարդան Հարությունյանը:
«Այսօր մենք սկիզբ ենք դնում բազմաֆունկցիոնալ ուսումնամարզական համալիրի կառուցմանը: Համալիրը կկառուցվի ամենաժամանակակից տեխնոլոգիաներով, կունենա մանկապարտեզ, դպրոց, լողավազան, սահադաշտ, ֆուտբոլային դաշտ, ժամանակակից մարզասրահներ: Մենք ցանկանում ենք, որ սերունդը առողջ, ուժեղ մեծանա: Այս համալիրը «Գազպրոմ Արմենիայի» ներդրումն է երիտասարդ Հայաստանի Հանրապետության ապագայում»,- ասաց Ալեքսեյ Միլլերը:
Նախագծի շինարարությունը, որի նախնական արժեքը կազմում է 49,3 մլն ԱՄՆ դոլար, ամբողջությամբ կիրականացնի «Գազպրոմ» ԲԲԸ-ն։ Համալիրի ընդհանուր մակերեսը կլինի 31 841 քմ: Համալիրն օրական կարող է ընդունել շուրջ 2000 մարդ: Համալիրի օբյեկտների շահագործման և սպասարկման համար նախատեսվում է ստեղծել ավելի քան 230 աշխատատեղ:
Տարածքում քաղաքապետարանի կողմից կկառուցվի նաեւ 5500 քմ մակերեսով պուրակ, ինչը դժգոհություն է առաջացրել հարակից շենքի բնակիչների շրջանում։
Նշենք, որ անցած տարվա մարտին Երեւանի քաղաքապետ Տարոն Մարգարյանը եղել էր նշված տարածքում, ներկայացրել պուրակի բարեկարգման նախագիծը, ըստ որի՝ 23 հազար քառակուսի մետր տարածքի վրա պետք է խաղահրապարակներ, զրուցարաններ կառուցվեին, կանաչապատում իրականացվեր։ Քաղաքապետարանը խոստացել էր աշխատանքներն ավարտել մինչեւ այս տարվա մարտի 1-ը։ Անցած ամիս քաղաքապետարանի տեղեկատվության եւ հասարակայնության հետ կապերի վարչության պետ Արթուր Գեւորգյանը NEWS.am-ի թղթակցին հայտնել էր, թե քաղաքապետը կատարելու է իր խոստումը, ուղղակի այն հետաձգվում է «Գազպրոմ-Արմենիայի» կողմից մանկապարտեզի եւ դպրոցի շինարարական աշխատանքների պատճառով։ Իսկ այսօր պարզվում է, որ տարածքի ահռելի մասը օտարել են «Գազպոմ-Արմենիային» ուսումնամարզական համալիր կառուցելու համար՝ կանաչ տարածքին թողնելով ընդամենը 5,5 հազար քառակուսի մետր, ընդ որում, որեւէ խաղահրապարակ հնարավոր չէ կառուցել շրջակայքի մի քանի տասնյակ շենքերի բնակիչների համար։
Այդ կապակցությամբ, հարակից շենքերի մի խումբ բնակիչներ բողոքի ակցիա էին արել՝ իրենց բնակարանների պատշգամբներում «Վաճառվում է» պաստառներ կախելով։
Քաղաքապետ Տարոն Մարգարյանը NEWS.am-ի հետ զրույցում պնդեց, որ ինքն ի սկզբանե խոստացել է 5000 քմ մակերեսով տարածքի վրա պուրակ կառուցել, այժմ այդ տարածքը ոչ թե կրճատվել, այլ ավելացել է 500 քմ-ով: Նա նաեւ հավաստիացրեց, որ պուրակը կառուցվելու է: