Գյումրու «Մոր եւ մանկան»հիվանդանոցում ապրիլի 14-ին մահացած 6 ամսական Նարե Դավթյանի ծնողները չեն հավատում, որ իրենց երեխան բնածին հիվանդություն է ունեցել՝ հիդրոցեֆալիա, ինչի հետեւանքով, ըստ բժիշկների, մահացել է երեխան։ Այս մասին NEWS.am-ի հետ զրույցում ասաց երեխայի հայրը` Արմեն Դավթյանը:
«Մենք տեղյակ չենք եղել, որ երեխայիս մոտ բնածին հիվանդություն կա»,- ասաց Արմեն Դավթյանը:
Արմեն Դավթյանի խոսքով՝ 6 ամսական փոքրիկի ինքնազգացողությունը ապրիլի 14-ի առավոտյան վատացել է եւ իրենք երեխային արագ տեղափոխել են հիվանդանոց:
«Առավոտյան երեխան հազացել է, ինչ որ հազալուց բերանից փրփուր է եկել, ինձի ձեն տվավ կինս, ելանք, բերանը սրբեցինք ու բերեցինք հիվանդանոց, մայրն էլ հիվանդանոցում էդպես ներկայացրել է, բժիշկները երեւի մտածել են երեխայի մոտ էպիլեպսիա է ու էպիլեպսիայի դեմ են բուժել, բայց մենք ասեցինք, որ երեխայի մոտ էդ հիվանդությունը չկա, իրանք սխալ բուժում են նշանակել, դրա համար երեխան չի դիմացել ու սիրտը կանգնել է»,- ասաց երեխայի հայրը:
Շիրակի մարզպետարանի առողջապահության վարչության պետը NEWS.am-ի հետ զրույցում ասաց, որ երեխայի առողջության մասին ծնողներին տեղյակ պահել են եւ ասել, որ նրա մոտ ախտորոշվել է հիդրոցեֆալիա՝ ողնուղեղային հեղուկի քանակի ավելացման հետևանքով գլխուղեղի հեղուկ պարունակող տարածությունների մեծացում, ինչն էլ մահվան պատճառ է հանդիսացել։
«Այդ երեխան լավ հետազոտված երեխա է եղել, ծնողներին էլ բժիշկները տեղյակ պահել են՝ ինչպես է նրա վիճակը, եթե իրենք մտածում են, որ բժիշկների սխալն է, թող դիմեն փորձագետներին, իրավապահներին, վերջապես պարզվի՝ կա արդյոք բժշկի մեղավորությունը»,-ասաց Հովհաննես Հովհաննիսյանը:
Երեխայի ծնողները դժգոհում են նաեւ բժիշկների անտարբեր վերաբերմունքից: Արմեն Դավթյանի խոսքով՝ ընդունող բժշկուհին եղել է Մարգարիտա Հարությունյանը, որը հարազատներին տեղյակ չի պահել երեխայի առողջության մասին, իսկ բուժող բժիշկ Արտուշ Սանոսյանը վստահեցրել է, որ երեխայի կյանքին վտանգ չի սպառնում:
«Ընդունող բժիշկին ժամ-ժամուկես սպասել ենք, հետո ոչ մի բան մեզ չէր ասում՝ ինչ բուժում է նշանակելու, ինչ վիճակում է երեխան, ծանր է, միջին ծանրության է, հետո գլուխը նկարել ենք, բերել։ Սանոսյանը նայեց, ասեց, որ հիդրոցեֆալիա է, ասեց, որ վտանգավոր բան չէ, մայրը մտել է հիվանդասենյակ, տեսել է, որ երեխայի բերանին բաներ կան միացրած, հարցրել է՝ ինչ է, ասել է՝ ուրախ չե՞ք, որ ձեր երեխային թթվածին ենք միացրել ու հիվանդության դեմը շուտ ենք առնում»,-ասաց Արմեն Դավթյանը:
Արմեն Դավթյանը նաեւ նշեց, որ իրենք արդեն ունեն դատաբժշկական փորձաքննության պատասխանները, որում երեխայի մահվան պատճառը թոքաբորբն է:
«Մահվան պատճառը սկզբից ասացին թոքաբորբն է եղել, հետո ասացին՝ ուղեղի հետ կապված հիդրոցեֆալիա է , հետո էլ ասին՝ սրտի կանգ է եղել, բայց դատաբժշկի տված թղթի մեջ գրած է մենակ թոքաբորբ, ով է ճիշտ՝ չգիտեմ։ Մենք մտածում ենք, որ իրենց սխալն է , եթե իրենց սխալը չէր, էդ դեպքում մեզ ինչո՞ւ տեղյակ չէին պահում, որ երեխայի վիճակը լավ չէ»,-ասաց Արմեն Դավթյանը:
Ծնողների խոսքով՝ հիդրոցեֆալիայի մասին իրենք իմացել են միայն նրա մահանալուց հետո: 6 ամսական Նարեն երկվորյակ եղբայր ունի, ընտանիքի յոթերորդ երեխան էր: