Հայոց ցեղասպանության հարցը խնդիր է, որի համար Շվեդիայի Ձախ կուսակցությունը (Vänsterpartiet) պայքարել է ոչ միայն երկրի ներսում, այլեւ միջազգային մակարդակով: Այս մասին NEWS.am-ի թղթակցի հետ զրույցում հայտարարեց Եվրախորհրդարանի շվեդ պատգամավոր, քաղաքացիական ազատությունների, արդարադատության եւ ներքին գործերի հանձնաժողովի անդամ Մալին Բյորքը:
Եվրախորհրդարանականը նշեց, որ երջանիկ է Հայոց ցեղասպանության շուրջ բանաձեւի ընդունման առօթով: «Շվեդական Ձախ կուսակցության բանաձեւը 2010 թվականին հանգեցրեց նրան, որ Շվեդիայի խորհրդարանը 1915 թվականի իրադարձությունները որպես ցեղասպանություն ճանաչեց»,- նշեց Մալին Բյորքը:
Հիշեցնենք, որ ապրիլի 15-ին Բրյուսելում Եվրախորհրդարանը Հայոց ցեղասպանության մասին բանաձեւ ընդունեց, որում Թուրքիային կոչ է արվում 1915 թվականի դաժանությունները որպես ցեղասպանություն ճանաչել, առերեսվել սեփական անցյալի հետ եւ ջանքեր գործադրել՝ հայ եւ թուրք ժողովուրդների իրական հաշտեցման ուղղությամբ: