Այս չորեքշաբթի Թուրքիայի նախագահի եւ Եվրախորհրդարանի միջեւ տարաձայնությունները հատկապես սուր երանգ ստացան։ Եվրախորհրդարանը Անկարային կոչ արեց 1915թ. Օսմանյան կայսրությունում հայերի ջարդերը Ցեղասպանություն ճանաչել եւ դա դարձնել հայ եւ թուրք ժողովուրդներին իրական հաշտության ուղին։ Սակայն երբ խոսքը 1915թ. ջարդերի մասին է, Էրդողանը դրան միշտ զգայական արձագանք է տալիս։ Դա արդեն պարզ էր Հռոմի Պապի հայտարարությունից հետո, որը առաջ բերեց թուրքական կառավարության սուր քննադատությունը։ Այս մասին գրում է գերմանական Der Spiegel պարբերականը։
Համաձայն պարբերականի՝ Հայոց ցեղասպանության մասին Եվրախորհրդարանի ընդունած բանաձեւի հարցում Գերմանիայի դիրքորոշումը նույնպես կարող է շրջադարձ առաջ բերել։ «Իհարկե ոչ այն պատճառով, որ Գերմանիան հանկարծ կորոշի բարկացնել Էրդողանին։ Ընդհակառակը Բեռլինը ստիպված է հաշտվել իր հասցեին հնչող մեղադրանքների հետ՝ զգուշանալով Ցեղասպանության հարցում իրերն իրենց անունով կոչելու դեպքում առաջ բերել Թուրքիայի զայրույթը»,- գրում է թերթը։
Գերմանիան եկող ուրբաթ հարգանքի տուրք է մատուցելու Հայոց ցեղասպանության զոհերի հիշատակին։ Բունդեսթագում պլանավորում է քննարկում անցկացնել, որի արդյունքում պետք է բանաձեւ ընդունվի։ Խորհրդարան ներկայացրած բանաձեւի այս նախագծում ցեղասպանություն բառը օգտագործում են ձախերն ու Կանաչների միությունը, իսկ իշխող կոլաիցիան դրա փոխարեն նախընտրում է խոսել ջարդերից եը տեղահանություններից։ Կանաչների առաջնորդ Ջեմ Օզդեմիրը քննադատում է կոալիցիայի դիրքորոշումը.«Այն, որ Գերմանիայի դաշնային կառավարությունը եւ կոալիցիան փախչում են իրականությունից, ուղղակի ամոթալի է»,- ասել էր Օզդեմիրը իր ելույթում։
Սակայն ոչ միայն ձախերն ու կանաչները, այլեւ իշխող կոալիցիայի առանձին անդամներ՝ Քրիստոնեա-դեմոկրատական միության պատգամավոր Քրիստոֆ Բերգերը եւ Սոցիալ-դեմոկրատական կուսակցության անդամ Դիթմար Նիթանը հիասթափված են, որ Գերմանիային կուլ է գնում Թուրքիայի քաղաքական ճնշմանը։
Ինչ վերաբերում է Գերմանիայի ԱԳՆ-ին, վերջինս իր հերթին հայտարարում է, որ ինքը հետաքրքրված է պատմության վերականգման գործում, սակայն չի ցանկանում երկխոսությունը հենց սկզբից զոհաբերել հասկացությունները կոնկրետ եզրերով սահմանելուն։ Քննադատները կասկածում են, որ Բեռլինը չի ցանկանում լարել Թուրքիայի հետ հարաբերությունները, որպեսզի չվնասի տնտեսական շահերին։ Մի քանի հազար գերմանական ձեռնարկություններ ակտիվ գործունեություն են ծավալում Թուրքիայում։
«Բացի այդ գերմանացի դիվանագետները չեն մոռանում, որ հունիսին Թուրքիայում խորհրդարանական ընտրություններ են կայանալու, եւ այդ ֆոնին Գերմանիան չի ցանկանում, որ ցեղասպանություն բառի պատճառով այնտեղ գլուխ բարձրացնեն հակաարեւմտյան ուժերը»,- եզրափակում է թերթը։
