Իրենց աշխատավարձային պարտքերը պահանջող «Նաիրիտ» ՓԲԸ ներկա եւ նախկին աշխատակիցները այսօր՝ ապրիլի 17-ին, հավաքվել են կառավարության շենքի մոտ եւ սպասում են, որ վարչապետ Հովիկ Աբրահամյանը խոստացածի համաձայն կընդունի իրենց:
Հիշեցնենք, որ ապրիլի 2-ին վարչապետ Հովիկ Աբրահամյանը «Նաիրիտ» ՓԲԸ հինգ աշխատակիցների հետ հանդիպմանը խոստացել էր աշխատավարձերի պարտքերի մարման ժամկետների մասին հստակ պատասխան տալ «Նաիրիտում» Համաշխարհային բանկի անցկացրած աուդիտի պատասխանը ստանալուց հետո՝ ապրիլի 17-ին:
Նաիրիտցիներին տեղեկացրել են, որ հանդիպումը տեղի կունենա ժամը 14:00-ին:
«Մենք այսօր մինչեւ ժամը 2-ը չենք աղմկելու, ոչ մի պաստառ չենք բարձրացնելու, լուռ սպասելու ենք վարչապետի պատասխանին: Ընդունելությունից հետո եթե պատասխանը դրական չեղավ, կշարունակենք բողոքի ցույցերը»,- NEWS.am-ին ասաց աշխատողներից Արա Կարեյանը:
Նշենք, որ նաիրիտցիները պահանջում են սահմանել իրենց աշխատավարձերի մարման հստակ ժամանակացույց:
Հիշեցնենք, որ հարկադիր պարապուրդի մատնված՝ «Նաիրիտ» գործարանի նախկին աշխատակիցների՝ 18-24 ամսվա աշխատավարձերի պարտքը կազմում է մոտ 15 մլն դոլար: Նրանք բազմիցս հավաքվել են Կառավարության եւ նախագահականի մոտ՝ պահանջելով իրենց խնդիրների լուծում:
