Կոտայքի մարզի Սոլակ գյուղում անասունների շրջանում բրուցելոզի վարակի հետեւանքով, որից վարակվել են նաեւ գյուղացիներ, Նորքի ինֆեկցիոն հիվանդանոց տեղափոխված քաղաքացին դեռ բուժվում է եւ մեկ շաբաթ էլ կմնա այնտեղ: NEWS.am-ի թղթակցի հետ զրույցում «Հիվանդությունների վերահսկման եւ կանխարգելման ազգային կենտրոն» ՊՈԱԿ-ի Հատուկ վտանգավոր վարակների բաժնի պետ Լիանա Թորոսյանը նշեց, որ հիվանդանոց տեղափոխված անձի ընտանիքի երկու անդամների մոտ եւս հայտնաբերվել է բրուցելոզ, կորոշվի՝ նրանց պետք է հոսպիտալացնել, թե բուժումը կարող են կազմակերպել ամբուլատոր կերպով: Լիանա Թորոսյանն ասաց, որ համատեղ աշխատանքներ են կատարում, երկու խումբ աշխատում է տեղում, պատրաստ են բոլոր թիրախավոր անձանցից, գանգատներ ունեցողներից անալիզ վերցնել, որպեսզի տեսնեն՝ նրանց մոտ առկա է բրուցելոզ, թե ոչ: ՊՈԱԿ-ը պատրաստ է այսօր 60 հոգուց անալիզ վերցնել:
Նշենք, որ բրուցելոզը մարդկանց եւ կենդաների համար ընդհանուր հիվանդություն է, մարդուն փոխանցվում է հիվանդ կենդանուց: Հիմնական ախտանիշներն են՝ ջերմություն, թուլություն, հոգնածություն, հոդացավեր, մկանացավեր, գիշերային քրտնարտադրություն: «Հիվանդությունների վերահսկման և կանխարգելման ազգային կենտրոն» ՊՈԱԿ-ից կոչ են անում Սոլակի բնակիչներին լինել առավել զգոն, նման ախտանիշների դեպքում անպայման դիմել բժշկի, համագործակցել պատկան մարմինների հետ, չթաքցնել հիվանդ կենդաներին, կաթնամթերքը օգտագործել դիետիկ մշակումից հետո, ուշադրություն դարձնել ախտահանման աշխատանքներին:
Հիշեցնենք, որ «Հայկական ժամանակ» թերթը գրել է, որ Կոտայքի մարզի Սոլակ գյուղում անասունների շրջանում բրուցելոզի վարակ է տարածվել, որը փոխանցվել է նաեւ գյուղի բնակիչներից մի քանիսին: Այս տեղեկությունը երեկ «ՀԺ»-ի հետ զրույցում հաստատել է գյուղապետ Բադալ Սարգսյանը:
ՀՀ առողջապահության նախարարության հասարակայնության հետ կապերի վարչությունից էլ հայտնել են, որ Սոլակի բնակիչներից մեկը, ում մոտ հաստատվել է բրուցելոգ ախտորոշումը, տեղափոխվել է Երեւանի «Նորք» ինֆեկցիոն հիվանդանոց»:
