Հայոց ցեղասպանության 100-րդ տարելիցին նվիրված բազմաթիվ միջոցառումների հետ կապված՝ Հայաստանի ոստիկանությունն ուժեղացված ծառայողական ռեժիմի է անցել:
Ապրիլի 17-ին կայացած մամուլի ասուլիսում ոստիկանապետի տեղակալ, գնդապետ Սամվել Հովհաննիսյանը տեղեկացրեց, որ ստեղծվել է աշխատանքային խումբ՝ ոստիկանապետի առաջին տեղակալ Հունան Պողոսյանի գլխավորությամբ: Համապատասխան հանձնարարականներ են տրվել՝ միջոցառումների ընթացքում հասարակական կարգի եւ ճանապարհային երթեւեկության անվտանգության ապահովման համար:
Սամվել Հովհաննիսյանի խոսքով, ապրիլի 1-ից ոստիկանության ստորաբաժանումներն անցել են ուժեղացված ծառայողական ռեժիմի: Առաջին հերթին դա վերաբերում է պետական օբյեկտների պահպանությանը:
«Կարող եք նկատել, որ Երեւանում երեք կամուրջներն ուժեղացված ռեժիմով են պահպանցում, մայրաքաղաքում եւ մարզերում մեծացել է պարեկային խմբերի թիվը: Ապրիլի 5-ից շներով հերթապահություն է անցկացվում»,- նշեց Սամվել Հովհաննիսյանը: