Հայաստանի ազգային հերոս Կարեն Դեմիրճյանի վաստակը Ցեղասպանության ճանաչման հարցում թերագնահատված է: Այս մասին այսօր՝ ապրիլի 17-ին, լրագրողների հետ զրույցում ասաց Կարեն Դեմիրճյանի այրին՝ Ռիմա Դեմիրճյանը, որը ազգային հերոսի ծննդյան օրն այցելել էր Կոմիտասի անվան պանթեոն՝ ամուսնու գերեզմանին:
«Այսօր հիշում են միայն 1960թ., հետո միանգամից թռնում 1990-ականներ, մնացածը մոռանում են: Հիշենք, որ առաջին անգամ ԽՍՀՄ-ում, նաեւ դրսի համար երկրի ղեկավարը ելույթ ունեցավ եւ առաջին անգամ արտասանեց գենոցիդ բառը: 1975թ. էր ու նա առաջինն էր, որ արտասանեց: Ու առաջին անգամ ժողովրդի եւ ղեկավարության համատեղ երթ տեղի ունեցավ դեպի Ծիծեռնակաբերդ: Առաջին անգամ համայն հայության համար լռության րոպե հնչեց»,- ասաց տիկին Ռիման:
Կարեն Դեմիրճյանի այրին նշեց, որ անկախ ամեն ինչից, իրենք Կարեն Դեմիրճյանի թանգարանում ցուցահանդես են նախաձեռնել Ցեղասպանության թեմայով:
