Ապրիլի 21-ին կգումարվի Հայաստանի Ազգային ժողովի արտահերթ նիստ: Այս մասին հայտնեցին NEWS.am-ի աղբյուրները:
Նիստի օրակարգում առայժմ մեկ հարց է ընդգրկված՝ «Հայոց ցեղասպանության 100-րդ տարելիցի կապակցությամբ» հայտարարության ընդունումը:
Փորձեցինք մեզ հասած տեղեկությունները ճշտել ԱԺ տեղեկատվության եւ հասարակայնության հետ կապերի վարչության պետ Արսեն Բաբայանից: Նա նշեց, որ պաշտոնական տեղեկատվություն չունի, հենց ունենա, կտարածվի հաղորդագրություն:
Նշենք, որ հայտարարության լրամշակված տարբերակում, որն արդեն մտել է ՀՀ ԱԺ օրակարգ, հղում է արվում ՄԱԿ-ի եւ միջազգային մի շարք հեղինակավոր կառույցների ընդունած այն կոնվենցիաներին եւ օրենքներին, որոնցով դատապարտվում են 1915 թ-ին Օսմանյան Թուրքիայի կողմից իրականացված ցեղասպանությունը: Հայտարարության լրամշակված նախագծին միացել են Աժ բոլոր հանձնաժողովների ներկայացուցիչ պատգամավորները:
