Գերմանիայի նախագահ Յոահիմ Գաուկը եկող շաբաթ Հայոց ցեղասպանության հիշատակի արարողությունների ժամանակ կարող է 100 տարի կատարվածն իր անունով կոչել եւ օգտագործել ցեղասպանություն եզրը։ Այս մասին գրում է գերմանական Tagesspiegel պարբերականը։
Եթե նախագահը նման քայլ անի, դա ամոթալի հարված կլինի Գերմանիայի կառավարությանը, որը խուսափում է ցեղասպանություն բառից։ Սակայն հենց կառավարական շրջանակներում ցեղասպանություն եզրից խուսափողների քննադատների քանակը գնալով աճում է, շարունակում է թերթը։
Կարտասանի՞ արդյոք Յոահիմ Գաուկը այդ բառը, որը իշխող կոալիցիան ՆԱՏՕ-ի գործընկեր Թուրքիայի հանդեպ ունեցած հարգանքից չի ցանկանում հիշատակել։ Արդեն շաբաթներ շարունակ խորհրդարանական ուժերը վիճում են 1915թ. Օսմանյան կայսրությունում տեղի ունեցածը հստակ կերպով Ցեղասպանություն որակելու համար։
Գերմանիայի քրիստոնեական եկեղեցիների հրավերով նախագահ Գաուկը ապրիլի 23-ին Բեռլինի մայր տաճարում կմասնակցի Հայոց ցեղասպանության զոհերի հիշատակին նվիրված էկումենիկ աղոթքին։ Դրա ավարտին նախագահը հանդես է գալու կարճ ելույթով։ Միայն աղոթքին մասնակցելու նրա դրական պատասխանը իշխող կոալիցիայի համար պետք է հստակ ցուցում լինի առ այն, որ Գաուկը առանց դիվանագիտական այլեւայլությունների Ցեղասպանությունն իր անունով է կոչելու, եզրափակում է Tagesspiegel-ը։
