Հայոց ցեղասպանության 100-ամյակին նվիրված միջոցառումների օրերին՝ ապրիլի 22-24-ին, Երեւանում եւ Էջմիածնում ճանապարհային երթեւեկությունը սահմանափակ կլինի։

Ինչպես ապրիլի 17-ին կայացած մամուլի ասուլիսի ժամանակ նշել է Ոստիկանության պետի տեղակալ Սամվել Հովհաննիսյանը, հիմնական միջոցառումներից մեկը՝ ֆորումը, կսկսվի ապրիլի 22-ին Մարզահամերգային համալիրում։ Նույն օրը երեկոյան Էջմիածնում կսկսվի 1.5 մլն զոհերի սրբադասման արարողության նախապատրաստումը։ Սրբադասման արարողությունը կսկսվի ապրիլի 23-ին ժամը 17։00-ին Էջմիածնում։ Ցանկացողները կարող են ժամը 14։00-ին Բրազիլիայի հրապարակից տանող ավտոբուսներով մասնակցել արարողությանը։ Էջմիածնում մինչեւ ժամը 14։00-ը փակ է լինելու  միայն Արարատյան փողոցը։ Ժամը 14-ից փակ կլինի  նաեւ Մաշտոցի փողոցը։

Նույն օրը Երեւանի Հանրապետության հրապարակում կկայանա System of a Down-ի համերգը։ Մուտքը հրապարակ սահմանափակ է։

Ծիծեռնակաբերդ հուշահամալիր տանող ճանապարհները փակ կլինեն ապրիլի 23-ին՝ մոտավորապես ժամը 19։00-ին։ Քաղաքացիների համար ապրիլի 24-ի առավոտից մինչեւ ժամը 13։00-ն մուտքը Ծիծեռնակաբերդ փակ է լինելու։ Այդ ժամանակահատվածում այնտեղ են լինելու պատվիրակությունները։ Ապրիլի 24-ին փակ կլինի նաեւ Կիեւյանից Բաղրամյան տանող անցուղին։

Ապրիլի 24-ին ՝ ժամը 20։15-ին, Հանրապետության հրապարակում կկայանա «Վերածնունդ» համերգ ակցիան, որից հետո ժամը 22։00-ին կմեկնարկի ջահերով երթը Ծիծեռնակաբերդ։ Համերգից հետո փողոցները բաց կլինեն։