System of a Down ռոք խմբի համերգի ժամանակ մուտքը դեպի Հանրապետության հրապարակ սահմանափակ է լինելու։ Այս մասին հայտարարել է Ոստիկանության պետի տեղակալ Սամվել Հովհաննիսյանը ապրիլի 17-ին կայացած մամուլի ասուլիսի ժամանակ։
Հիշեցնենք, որ ապրիլի 23-ին Երեւանում կայանալիք համերգը կեզրափակի խմբի «Արթնացնենք հոգիները» (Wake Up The Souls) համաշխարհային համերգային շրջագայությունը։
Համերգի ժամանակ հրապարակ մուտքը կթույլատրվի միայն Շահումյան հրապարակից։ Ելքը կլինի Տիգրան Մեծ եւ Ամիրյան փողոցներից։ Աբովյան եւ Նալբանդյան փողոցները փակ կլինեն։ Հանդիսատեսների քանակը նույնպես սահմանափակ է լինելու։ Հրապարակ կարող է մտնել միայն 50 հազար երկրպագու։ Քաղաքացիների քանակը հաշվելու են հատուկ տեղադրված պտուտադռնակներով։
Սամվել Հովհաննիսյանի խոսքով՝ ոստիկանությունն ուսումնասիրում է սոցցանցերը եւ տեղյակ է, որ համերգին ներկա լինելու ցանկացողներ կան Վրաստանից եւ Իրանից։
