Եվրասիական տնտեսական միության շրջանակում Հայաստանի ստանձնած պարտավորությունները չեն խանգարում Եվրամիության հետ երկրի հարաբերությունների առաջընթացին: Այս մասին ապրիլի 17-ին խորհրդարանում կայացած «Ռիգայում Արեւելյան գործընկերության գագաթաժողովի նախաշեմին» թեմայով լսումներից հետո հայտարարեց Հայաստանում ԵՄ ներկայացուցչության ղեկավար Տրայան Հրիսթեան:
Նրա խոսքով, ԵՄ-ն մտադիր է զարգացնել հարաբերություններն Արեւելյան գործընկերության բոլոր երկրների հետ. ոչ միայն Ասոցացման մասին Համաձայնագիր ստորագրած Վրաստանի, Ուկրաինայի եւ Մոլդովայի, այլեւ Հայաստանի, Ադրբեջանի ու, ինչու ոչ, Բելառուսի հետ: Եվրամիությունը մտադիր է շարունակել գործընկերությունը՝ անկախ այդ երկրների եվրաինտեգրման մակարդակից եւ այլ բլոկներում նրանց հնարավոր միջազգային պարտավորություններից: «Մենք ցանկանում ենք խուսափել բաժանարար գծերից»,- հավելեց ԵՄ դեսպանը:
Հիշեցնենք, որ Արեւելյան գործընկերության հերթական գագաթաժողովը նախանշված է մայիսի 21-22-ին, Ռիգայում: