Երեւանի Վազգեն Սարգսյանի անվան ռազմական ինստիտուտում 19-ամյա կուրսանտ Հայկազ Բարսեղյանի գործով նշանակված դատաբժշկական փորձաքննության եզրակացության մեջ ամեն ինչ հստակ նշված է: Այս մասին NEWS.am-ին ասաց գործով տուժողի իրավահաջորդի ներկայացուցիչ Գարիկ Գալիկյանը՝ անդրադառնալով գործով կալանավորված Նորիկ Սահակյանի փաստաբան Հովիկ Արսենյանի հրապարակած փորձաքննության արդյունքներին:
«Դատաբժշկական փորձաքննության եզրակացության մեջ ամեն ինչ հստակ, պարզ եւ մանրամասն նշված է, թե ինչից է մահացել, երբ է մահը վրան հասել, ինչ հանգամանքներում է դեպքը տեղի ունեցել: Այս պահին փորձաքննության արդյունքները հրապարակել չեմ կարող, քանի որ նախաքննություն է ընթանում»,- ասաց նա՝ նշելով միայն, որ Հովիկ Արսենյանի խոսքերն այնքան էլ իրականությանը չեն համապատասխանում:
Նշենք, որ Հովիկ Արսենյանն ավելի վաղ մեզ հետ զրույցում հայտնել էր, որ Հայկազ Բարսեղյանի մահը վրա է հասել կոկորդին հասցված վնասվածքից:
Հիշեցնենք, որ հունվարի 29-ին՝ ժամը 06:35-ի սահմանում Երեւանում տեղակայված ուսումնական զորամասերից մեկի մարզահրապարակում հայտնաբերվել էր նույն զորամասի 1-ին կուրսի ուսանող Հայկազ Արկադիի Բարսեղյանի դին՝ պտտաձողի վրա պարանով կախված վիճակում: Հարազատները NEWS.am-ին պատմել էին, որ նրան նախ ծեծել են, ապա կախել։ Հիշեցնենք, որ ՊՆ Սեյրան Օհանյանի խոսքով՝ Հայկազի սպանությանը նախորդել է վեճը ծառայակիցների հետ, սպանության համար մեղադրվողները եղել են ալկոհոլի ազդեցության տակ։ Հարազատները կարծում են, որ նման հաշվեհարդարի պատճառն այն է եղել, որ Հայկազը չի ենթարկվել ինտիտուտում 4 ծառայակիցների ստեղծած վախի մթնոլորտին: Դեպքի առթիվ ՀՀ քննչական կոմիտեի զինվորական քննչական գլխավոր վարչությունում հարուցվել է քրեական գործ՝ ՀՀ քրեական օրենսգրքի 104-րդ հոդվածի 2-րդ մասի 7-րդ կետով: Մեղադրանք է առաջադրվել Հայկազ Բարսեղյանի համածառայակիցներ Վաչե Սահակյանին, Մովսես Ազարյանին, Գնել Թեւոսյանին եւ Նորիկ Սահակյանին, նրանք կալանավորված են:
Նույն դեպքով ՀՀ քննչական կոմիտեի զինվորական քննչական գլխավոր վարչությունում հարուցվել է նոր քրեական գործ` ՀՀ քրեական օրենսգրքի 375-րդ հոդվածի 1-ին մասով (իշխանության անգործությունը, որն էական վնաս է պատճառել), որի շրջանակում փետրվարի 16-ին կալանավորվել է ՀՀ ՊՆ Վազգեն Սարգսյանի անվան ռազմական ինստիտուտի սպա, կապիտան Արտյոմ Ավետիսյանը։
